---Advertisement---
मुंबई: खरीप हंगामाच्या तोंडावर राज्यातील बळीराजा पुन्हा एकदा संकटात सापडला आहे. रासायनिक खते खरेदी करताना कृषी सेवा केंद्रांकडून शेतकऱ्यांना महागडी कीटकनाशके आणि बुरशीनाशके घेण्याची सक्ती केली जात असून, ही सरळ सरळ लूट असल्याचा खळबळजनक आरोप राष्ट्रवादी काँग्रेस (शरदचंद्र पवार) पक्षाच्या महिला प्रदेशाध्यक्षा रोहिणी खडसे यांनी केला आहे.
’लिंकिंग’चा विळखा आणि आर्थिक फटका
सध्या राज्यात खरीप हंगामाची लगबग सुरू असून शेतकरी खत खरेदीसाठी गर्दी करत आहेत. मात्र, युरिया किंवा डीएपी सारख्या खतांच्या गोणीसोबत विक्रेते इतर महागडी औषधे ‘लिंक’ करून विकत आहेत. खतांच्या किमती आधीच २५ ते ८५ टक्क्यांनी वाढल्या असताना, या अतिरिक्त खर्चामुळे शेतकऱ्यांचे कंबरडे मोडले आहे. “लिंकिंग ही भानगड म्हणजे शेतकऱ्यांची लूट असून सरकार आणि कंपन्या संगनमताने शेतकऱ्यांना वेठीस धरत आहेत की काय?” असा संतप्त सवाल रोहिणी खडसे यांनी उपस्थित केला आहे.
रोहिणी खडसे यांनी खतांच्या वाढत्या किमतींबाबत चिंता व्यक्त करताना म्हटले की:
आखाती देशांतील युद्धामुळे कच्च्या मालाच्या किमती जागतिक पातळीवर ६०० टक्क्यांपर्यंत वाढल्या आहेत.
याचा थेट परिणाम देशांतर्गत खतांच्या दरांवर झाला असून, खतांच्या किमतीत १०.८४ ते ८५.७१ टक्के वाढ झाली आहे.
आधीच अतिवृष्टी आणि अवकाळी पावसामुळे पिचलेला शेतकरी आता या दरवाढीमुळे हवालदिल झाला आहे.
”कंपन्या स्वतःच्या नफ्यासाठी शेतकऱ्यांची पिळवणूक करत आहेत. या गंभीर विषयात सरकारने तात्काळ हस्तक्षेप करून ‘लिंकिंग’ची सक्ती करणाऱ्या विक्रेत्यांवर आणि कंपन्यांवर कठोर कारवाई करावी,” अशी मागणी खडसे यांनी केली आहे. शेती करायची की सोडून द्यायची, असा गंभीर प्रश्न आज शेतकऱ्यासमोर उभा राहिला असून केंद्राने यावर आपली भूमिका स्पष्ट करावी, असेही त्यांनी नमूद केले.
या प्रकरणामुळे आता खत विक्रीतील पारदर्शकता आणि सरकारच्या नियंत्रणावर मोठे प्रश्नचिन्ह निर्माण झाले आहे.
