मुंबई : महाराष्ट्रात पुन्हा एकदा महायुतीचे सरकार स्थापन झाल्यापासून उपमुख्यमंत्री एकनाथ शिंदे सातत्याने चर्चेत आहेत. आपल्या ठाम आणि आक्रमक भूमिकेमुळे ते वारंवार राजकीय वर्तुळात चर्चेचा विषय ठरत आहेत. आता त्यांनी पुन्हा एकदा आपल्या टीकेच्या तडाख्यात विरोधकांना घेत जोरदार इशारा दिला आहे.
एकनाथ शिंदे यांनी आपल्या वक्तव्यात विरोधकांना लक्ष्य करताना स्पष्ट शब्दांत सांगितले की, “मला हलक्यात घेऊ नका! ज्यांनी मला 2022 मध्ये हलक्यात घेतले, त्यांचा टांगा पलटी झाला. मी सरकार बदलले आणि महाराष्ट्रात सामान्य लोकांच्या मनातील सरकार आणले. मी विधानसभेत पहिल्याच भाषणात सांगितले होते की देवेंद्र फडणवीस यांना 200 पेक्षा जास्त जागा मिळतील, आणि आम्हाला 232 जागा मिळाल्या. त्यामुळे मला हलक्यात घेऊ नका!”
त्यांच्या या वक्तव्यामुळे राजकीय वर्तुळात चर्चेला उधाण आले असून, त्यांनी नेमका इशारा कुणाला दिला आहे, याबद्दल तर्कवितर्क लावले जात आहेत. शिवसेना (ठाकरे गट) प्रमुख उद्धव ठाकरे आणि इतर विरोधकांवर त्यांनी अप्रत्यक्ष हल्लाबोल केला असल्याची चर्चा रंगली आहे.
दरम्यान, काही दिवसांपूर्वी एकनाथ शिंदे यांच्या गाडीला बॉम्बने उडवून देण्याची धमकी देणारा ईमेल पोलिसांना मिळाला होता. या प्रकरणात आता मुंबई पोलिसांनी मोठी कारवाई करत बुलढाणा जिल्ह्यातून दोन आरोपींना अटक केली आहे.
अटक करण्यात आलेल्या व्यक्तींची नावे मंगेश वायल आणि अभय शिंगणे अशी आहेत. दोघेही बुलढाण्याच्या देऊळगाव राजा येथील रहिवासी असल्याची माहिती समोर आली आहे. या प्रकरणी पोलिसांनी गुन्हा दाखल करून अधिक तपास सुरू केला आहे.
या धमकीवर प्रतिक्रिया देताना एकनाथ शिंदे म्हणाले, “माझ्या कारला उडवून देण्याची धमकी मिळाली. याआधीही मला अनेकदा जीवे मारण्याच्या धमक्या आल्या आहेत. पण मी भीत नाही!”
