जळगाव : मध्य आणि पश्चिम लोहमार्ग जळगाव जंक्शन स्थानकावर सुरत लोहमार्गावर उभ्या असलेल्या मालगाडी वॅगनच्या दरवाजाचे टॅग असलेले सील तोडून चोरट्यांनी तब्बल १२७ खताच्या गोण्या लांबविल्याची घटना घडली.
याबाबत जळगाव लोहमार्ग पोलीस ठाण्यात २७ मार्च रोजी तक्रार नोंदविण्यात आली होती. याप्रकरणी रेल्वे पोलिसांनी पिंपळकोठा, ता. एरंडोल येथून तीन संशयितांना अटक करीत रासायनिक खताच्या ७५ गोण्या जप्त केल्या आहेत.
गुरुवारी (२६ मार्च) सुरत-जळगाव पश्चिम लोहमार्गावरील गुड्स शेडमध्ये मालगाडी उभी होती. दरम्यान, या मालगाडीच्या एका वॅगनच्या दरवाजाचे सील उघडून चोरट्यांनी ७८ हजार ७४० रुपये किमतीच्या १२७ खताच्या गोण्या चोरून नेल्या.
या प्रकरणी जळगाव रेल्वे पोलिसांत नोंद करण्यात येऊन आरपीएफ पोलीस निरीक्षक ज्ञानेश्वर पाटील यांच्या मार्गदर्शनाखाली सहायक उपनिरीक्षक शिवपूजन सिंह, एस. बी. चौधरी, कॉन्स्टेबल पंकज वाघ, विनोद जेठवे यांनी तपास सुरू केला. तपासाअंती योगेश बडगुजर (वय ४६, रा. पिंपळकोठा, ता. एरंडोल) याची चौकशी केली असता १२७ खताच्या गोण्या दोन जणांच्या मदतीने चोरत्याची त्याने कबुली दिली. यातील काही गोण्या विशाल पाटील, लीलाधर बडगुजर यांना विकल्या.
या प्रकरणी योगेश बडगुजर, विशाल पाटील, लीलाधर बडगुजर या तीनही संशयिताना गुरुवारी (३ एप्रिल) अटक करून लोहमार्ग न्यायालयात हजर करण्यात आले. फरार असलेल्या अन्य दोन आरोपींचा तपास आरपीएफ पोलीस करीत आहेत.
