Jalgaon : राज्यात सध्या चोरीच्या घटनांमध्ये दिवसोंदिवस वाढ होत आहे. त्यात दुचाकी चोरीचे प्रमाण लक्षणीय आहे. अश्यात पुणे- छत्रपती संभाजीनगर येथून चोरलेल्या दुचाकी जळगावात विक्री करण्याचा प्रयत्न एकाला चांगलाच महागात पडला आहे. चोरीच्या या बुलेट जळगावत विक्री करण्यासाठी आलेल्या या चोरट्याला पोलिसांनी सापळा रचून जेरबंद केले आहे. एमआयडीसी पोलिसांनी आज १९ एप्रिल रोजी सकाळी १० वाजता ही कारवाई केली. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.
याबाबत पोलिसांकडून मिळालेल्या माहितीनुसार, छत्रपती संभाजीनगरमधील एक तरुण चोरीची महागडी बुलेट स्वस्तात विक्री करण्यासाठी जळगावात येत आहे. हा चोरटा अजिंठा चौफुली येथे येणार असल्याची गुप्त माहिती एमआयडीसी पोलीस ठाण्याचे पोलिस निरीक्षक संदीप पाटील यांना मिळाली होती. त्यानुसार गुन्हे शोध पथकाने सापळा रचला.
पथकाला अजिंठा चौफुली येथे लाल रंगाची विना नंबर प्लेटची बुलेट घेऊन उभा असलेला एक तरुण संशयास्पद अवस्थेत दिसला. त्यानुसार पथकाने त्याला ताब्यात घेऊन नाव विचारले असता त्याने साजीद खान असे सांगितले. पोलिसांचा संशय अधिक बळावल्याने त्यांनी त्याला बुलेटच्या कागदपत्रांची मागणी केली. त्याच्याकडे कोणतेही कागदपत्र नसल्याने पोलिसांनी बुलेटच्या चेसी नंबरची ऑनलाइन तपासणी केली. या तपासणीत ही बुलेट पुणे येथील असल्याचे उघड झाले. तर पुढील तपासात दुसरी बुलेट ही छत्रपती संभाजीनगर येथील असल्याचे तपासात निष्पन्न झाले.
याप्रकरणी साजीद खान याला एमआयडीसी पोलिसांनी अटक केली. तसेच त्याच्याकडील अडीच लाख रूपये किंमतीच्या दोन बुलेट मोटारसायकल जप्त करण्यात आल्या असून साजीद खान याच्याविरुद्ध एमआयडीसी ठाण्यात चोरीचा गुन्हा दाखल करण्यात आला आहे.
