‘ऑपरेशन सिंदूर’मुळे निराश झालेल्या पाकिस्तानने गुरुवारी (८ मे ) भारतीय शहरांमधील लष्करी तळांवर हल्ला करण्याचा प्रयत्न केला, परंतु त्यांना पराभव पत्करावा लागला. पाकिस्तानने जालंधर, जम्मू, भटिंडा, अवंतीपुरा, श्रीनगर, पठाणकोट, अमृतसर आणि कपूरथळा यासह १५ शहरांमधील लष्करी तळांवर हल्ला करण्याचा प्रयत्न केला, परंतु त्यांची क्षेपणास्त्रे भारताच्या सामर्थ्यासमोर टिकू शकली नाहीत आणि ती पूर्णपणे नष्ट झाली. दरम्यान, देशातील अनेक शहरांमध्ये झालेल्या ड्रोन हल्ल्यांमध्ये पाकिस्तानच्या हवाई संरक्षण क्षेपणास्त्र प्रणाली HQ-9 च्या युनिट्सचे मोठे नुकसान झाले आहे.
HQ-9 हवाई संरक्षण प्रणालीचा नाश हा पाकिस्तानसाठी एक मोठा धक्का आहे, ज्याचे पडसाद बीजिंगपासून इस्लामाबादपर्यंत ऐकू येत आहेत. सूत्रांनी दिलेल्या माहितीनुसार, ड्रोन हल्ल्यात पाकिस्तानी लष्कराच्या HQ-9 क्षेपणास्त्र संरक्षण प्रणाली युनिट्सचे मोठे नुकसान झाले आहे. लाहोर, सियालकोट, गुजरांवाला, रावळपिंडी, चकवाल, बहावलपूर, मियांवाली, कराची, चोर, मियांओ आणि अटोक हे असे ड्रोन हल्ले झाले आहेत.
सरकारने जारी केलेल्या निवेदनानुसार, ‘आज सकाळी भारतीय लष्कराने पाकिस्तानच्या विविध भागात तैनात केलेल्या हवाई संरक्षण रडार आणि प्रणालींना लक्ष्य केले. भारतानेही पाकिस्तानला त्याच पद्धतीने प्रत्युत्तर दिले आहे. लाहोरमध्ये एक हवाई संरक्षण युनिट निष्क्रिय करण्यात आल्याचेही समोर आले आहे.
७ आणि ८ मे च्या मध्यंतरी रात्री पाकिस्तानने अवंतीपुरा, श्रीनगर, जम्मू, पठाणकोट, अमृतसर, कपूरथळा, जालंधर, लुधियाना, आदमपूर, भटिंडा, चंदीगड, नाल, फलोदी, उत्तरलाई आणि भूज यासह उत्तर आणि पश्चिम भारतातील अनेक लष्करी प्रतिष्ठानांवर ड्रोन आणि क्षेपणास्त्रांचा वापर करून हल्ला करण्याचा प्रयत्न केला. हे हल्ले काउंटर यूएएस ग्रिड आणि हवाई संरक्षण प्रणालींनी निष्प्रभ केले. आता अनेक ठिकाणांहून मलबे सापडत आहेत, जे पाकिस्तानी हल्ल्यांचे पुरावे आहेत.
