जळगाव : स्वयंपाक करताना अचानक आगीचा भडका उडाल्यामुळे गंभीररित्या भाजलेल्या महिलेचा उपचारादरम्यान मृत्यू झाला. ही घटना रामेश्वर कॉलनीत गुरुवारी (२२ मे) मध्यरात्री दीड वाजण्याच्या सुमारास घडली. उषा गुलाब मोरे (५०) असे मृत महिलेचे नाव असून याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
जळगाव शहरातील रामेश्वर कॉलनीत उषा मोरे यांच्या पश्चात मुलगा, विवाहित मुलगी असा परिवार आहे. दरम्यान, एक महिन्यापूर्वी स्वयंपाक करीत असताना अचानक आगीचा भडका उडाला आणि त्या या आगीच्या भक्ष्यस्थानी पडल्या. त्या गंभीररित्या भाजल्या होत्या. त्यांना तात्काळ खाजगी रुग्णालयात दाखल करण्यात आले होते.
त्यानंतर गेल्या आठ दिवसांपूर्वी त्यांना शासकीय वैद्यकीय महाविद्यालय व रुग्णालयात उपचारासाठी दाखल करण्यात आले होते. उपचार सुरु असताना गुरुवारी मध्यरात्री १.३० वाजताच्या सुमारास त्यांनी अखेरचा श्वास घेतला. कुटुंबीयांनी एकच आक्रोश केला. रुग्णालयात त्यांच्या नातेवाईकांनी मोठी गर्दी केली होती. या घटनेमुळे मेहरूण परिसरात हळहळ व्यक्त होत आहे. एमआयडीसी पोलीस ठाण्यात अकस्मात मृत्यूची नोंद करण्यात आली आहे.
गांजाची नशा केल्याने गुन्हा
जळगाव : गांजाचा नशा करणाऱ्या तरुणाविरुद्ध एनडीपीएस अॅक्टनुसार एमआयडीसी पोलिसांनी १९ मे रोजी रात्री अजिंठा चौक परिसरात कारवाई केली आहे. सागर जीवन आढाळे (रा. यावल) याच्यावर एमआयडीसी पोलिसात गुन्हा दाखल करण्यात आला आहे. तसेच पोलिसांनी त्याच्याजवळून गांजा जप्त केला आहे.
