भोंदू खरातचे कॉल रेकॉर्ड अंजली दमानियांकडून जाहीर; चाकणकर, केसरकर, उपमुख्यमंत्री एकनाथ शिंदे यांच्यासह अनेकांसोबत खरातच झालं बोलणं…!

अशोक खरात प्रकरणाने सध्या महाराष्ट्रात मोठी खळबळ उडवली आहे. भोंदूबाबा म्हणून ओळखला जाणारा अशोक खरात हा केवळ सामान्य गुन्हेगारी प्रकरणापुरता मर्यादित नसून, त्याचे धागेदोरे थेट राजकीय वर्तुळापर्यंत पोहोचत असल्याचे आरोप समोर येत आहेत. या प्रकरणाला नवा वळण मिळालं ते सामाजिक कार्यकर्त्या अंजली दमानिया यांनी केलेल्या मोठ्या खुलाशामुळे.

अंजली दमानिया यांनी दावा केला आहे की, त्यांनी अशोक खरातच्या कॉल डिटेल रेकॉर्डची म्हणजेच CDRची माहिती सार्वजनिक केली आहे. या माहितीनुसार खरातच्या मोबाईलवरून अनेक मोठ्या नेत्यांशी वारंवार संपर्क झाल्याचं दिसून येत असल्याचा त्यांचा आरोप आहे. या यादीत काही अत्यंत धक्कादायक नावे समोर आली असून त्यामुळे राजकीय वर्तुळातही खळबळ उडाली आहे.

दमानिया यांच्या दाव्यानुसार कोण-कोणांची नावे समोर आली?

रूपाली चाकणकर → 177 कॉल्स
प्रतिभा चाकणकर → 236 कॉल्स
एकनाथ शिंदे → 17 कॉल्स (एक कॉल 21 मिनिटांचा)
दीपक लोंढे → 189 कॉल्स
चंद्रकांत पाटील → 8 कॉल्स
सुनील तटकरे → 8 कॉल्स
आशिष शेलार → 1 कॉल

तसेच, परदेशातून (कतार, UAE, ऑस्ट्रेलिया) देखील कॉल्स आल्याचा दावा आहे.

या कथित CDRनुसार, रूपाली चाकणकर यांच्यासोबत अशोक खरातचे तब्बल १७७ कॉल्स झाल्याचा दावा करण्यात आला आहे. या कॉल्समध्ये एकूण संभाषणाचा कालावधीही मोठा असल्याचं सांगितलं जात आहे. एवढंच नाही, तर रूपाली चाकणकर यांच्या कुटुंबातील सदस्यांचाही यात समावेश असल्याचं समोर आलं आहे. त्यांच्या बहिणी प्रतिभा चाकणकर यांचे देखील शेकडो कॉल्स खरातला झाल्याचा दावा केला जातो.

या प्रकरणात सर्वात जास्त चर्चेत आलेलं नाव म्हणजे राज्याचे उपमुख्यमंत्री एकनाथ शिंदे. त्यांच्या नावासोबतही कॉल रेकॉर्डचा उल्लेख करण्यात आला आहे. दमानिया यांच्या म्हणण्यानुसार, शिंदे आणि खरात यांच्यात १७ वेळा फोनवर संवाद झाला असून त्यातील एक संभाषण तब्बल २१ मिनिटे चालल्याचा दावा करण्यात आला आहे. या दाव्यांमुळे राजकीय वातावरण अधिक तापलं आहे आणि विरोधकांकडून प्रश्न उपस्थित केले जात आहेत.

याशिवाय, दीपक लोंढे, तसेच काही अन्य प्रमुख नेत्यांची नावेही या यादीत असल्याचं सांगितलं जात आहे. भाजप आणि इतर पक्षांतील काही नेत्यांशीही संपर्क झाल्याचा उल्लेख करण्यात आला आहे. त्यामुळे हे प्रकरण केवळ एका व्यक्तीपुरतं मर्यादित न राहता, त्याचा व्याप अधिक मोठा असल्याची चर्चा रंगली आहे.

अंजली दमानिया यांनी या सर्व बाबींचा आधार घेत उपमुख्यमंत्र्यांसह संबंधित नेत्यांनी जनतेसमोर स्पष्ट भूमिका मांडावी, अशी मागणी केली आहे. त्यांनी प्रश्न उपस्थित केला आहे की, एका भोंदूबाबाशी एवढ्या मोठ्या प्रमाणावर संपर्क का ठेवण्यात आला? या संभाषणांमागे नेमकं काय कारण होतं, हे समोर यायला हवं.

दमानिया यांनी आणखी एक गंभीर दावा केला आहे की, अशोक खरातला केवळ महाराष्ट्रातूनच नव्हे तर परदेशातूनही मोठ्या प्रमाणावर फोन कॉल्स आले आहेत. कतार, यूएई आणि ऑस्ट्रेलिया सारख्या देशांमधून संपर्क झाल्याचं सांगितलं जात आहे. यामुळे या प्रकरणाची व्याप्ती आणखी वाढल्याचं चित्र निर्माण झालं आहे.

महत्त्वाची बाब म्हणजे, ही सर्व माहिती दमानिया यांनी संबंधित अधिकाऱ्यांकडे सुपूर्द केली आहे. मुख्यमंत्री, पोलीस महासंचालक आणि एसआयटीकडे ही माहिती देण्यात आल्याचं त्यांनी स्पष्ट केलं आहे. मात्र, ही माहिती त्यांना नेमकी कुणाकडून मिळाली, याबाबत त्यांनी अनभिज्ञता दर्शवली आहे.

सध्या या सर्व प्रकरणात सर्वात महत्त्वाची गोष्ट म्हणजे अधिकृत तपास. कारण CDRमध्ये नाव असणं म्हणजे गुन्हा सिद्ध झाला असं होत नाही. फोन कॉल्स झाले असतील, पण त्या संभाषणामागचा हेतू काय होता, हे तपासातूनच स्पष्ट होऊ शकतं. त्यामुळे अंतिम निष्कर्ष काढण्याआधी अधिकृत यंत्रणांकडून येणाऱ्या माहितीची प्रतीक्षा करणं आवश्यक आहे.

एकूणच, अशोक खरात प्रकरण आता केवळ गुन्हेगारी चौकटीत न राहता राजकीय पातळीवरही मोठा मुद्दा बनत आहे. पुढील काही दिवसांत या प्रकरणात आणखी मोठे खुलासे होण्याची शक्यता वर्तवली जात आहे. आता सर्वांचं लक्ष आहे ते तपास यंत्रणांच्या अहवालाकडे, कारण त्यातूनच या संपूर्ण प्रकरणाचं खरं चित्र समोर येणार आहे.