---Advertisement---
उन्हाळ्याच्या सुट्ट्यांची आतुरतेने वाट पाहणाऱ्या विद्यार्थ्यांसह पालकांसाठी महत्त्वाची बातमी समोर आली आहे. राज्यातील शाळांच्या उन्हाळी सुट्ट्यांबाबत शिक्षण विभागाने अधिकृत वेळापत्रक जाहीर केले असून यंदा सुट्ट्या नेहमीपेक्षा उशिरा सुरू होणार आहेत. नव्या निर्णयानुसार राज्यातील सर्व शाळांना २ मेपासून उन्हाळी सुट्टी लागू होणार आहे.
दरवर्षी साधारणपणे एप्रिलच्या मध्यापासून सुरू होणाऱ्या सुट्ट्या यंदा मे महिन्याच्या सुरुवातीला सुरू होणार असल्याने विद्यार्थ्यांच्या शालेय दिनक्रमात मोठा बदल होणार आहे. १ मे रोजी शालेय निकाल जाहीर झाल्यानंतरच अधिकृतपणे सुट्टी सुरू करण्यात येणार असल्याचे स्पष्ट करण्यात आले आहे. त्यामुळे एप्रिल महिन्याच्या शेवटपर्यंत शाळा नियमित सुरू राहणार आहेत.
शिक्षण संचालनालय (माध्यमिक व उच्च माध्यमिक), पुणे तसेच प्राथमिक शिक्षण संचालनालयाने परिपत्रकाद्वारे ही माहिती दिली आहे. काही शाळांमध्ये स्थानिक परिस्थिती, शैक्षणिक उपक्रम किंवा इतर कारणांमुळे शाळा सुरू असल्यास, संबंधित प्रशासनाने विद्यार्थ्यांच्या हिताचा विचार करून सुट्टीबाबत स्वतंत्र निर्णय घेण्याचेही निर्देश देण्यात आले आहेत.
विशेष म्हणजे यंदा सुट्टीचा कालावधी तुलनेने कमी असणार आहे. कारण जून महिन्यात शाळा नेहमीपेक्षा लवकर सुरू करण्याचा निर्णय घेण्यात आला आहे. राज्यातील सर्व शाळा १५ जूनपासून पुन्हा सुरू होणार असून त्याच दिवसापासून नियमित अध्यापनाला सुरुवात करण्याचे आदेश देण्यात आले आहेत. त्यामुळे विद्यार्थ्यांना मिळणाऱ्या सुट्ट्यांचे दिवस कमी होणार आहेत.
दरम्यान, जून महिन्यातील वाढत्या तापमानाचा विचार करून विशेषतः विदर्भातील शाळांसाठी स्वतंत्र वेळापत्रक लागू करण्यात आले आहे. १५ जून ते २७ जून या कालावधीत विदर्भातील शाळा सकाळी ७ ते ११.४५ या वेळेतच भरवण्यात येणार आहेत. त्यानंतर ३० जूनपासून सर्व शाळा पुन्हा नियमित वेळेनुसार सुरू होतील.
या बदलामुळे विद्यार्थ्यांसह पालकांनाही आपल्या सुट्ट्यांचे नियोजन नव्याने करावे लागणार आहे. एकीकडे सुट्टी उशिरा सुरू होणार आणि दुसरीकडे तिचा कालावधी कमी असणार असल्याने या निर्णयाचा परिणाम विद्यार्थ्यांच्या दिनक्रमावर आणि कुटुंबाच्या नियोजनावर होणार असल्याचे स्पष्ट दिसून येत आहे.
