---Advertisement---
पश्चिम आशियात सुरू असलेल्या अमेरिका–इस्रायल–इराण तणावात नवे वळण आले आहे. डोनाल्ड ट्रम्प यांनी शांती चर्चांचा दावा केला असला तरी इराणने तो फेटाळला आहे. याच पार्श्वभूमीवर कतार पुन्हा एकदा मध्यस्थी करण्यास तयार झाल्याची माहिती समोर आली आहे.
चर्चांवर संभ्रम
अमेरिकेचे राष्ट्रपती डोनाल्ड ट्रम्प यांनी इराणविरुद्धची कारवाई पुढील दोन ते तीन आठवड्यांत संपेल, असा दावा करत शांती चर्चाही सुरू असल्याचे सांगितले. मात्र इराणने हा दावा नाकारत, कोणतीही अधिकृत चर्चा सुरू नसून केवळ विविध माध्यमांद्वारे संवाद होत असल्याचे स्पष्ट केले.
कतारची मध्यस्थी
यापूर्वी पाकिस्तान ने मध्यस्थीचा प्रयत्न केला होता, मात्र इराणने अविश्वास व्यक्त केला होता. आता कतार ने पुन्हा पुढाकार घेत दोन्ही देशांमध्ये समेट घडवून आणण्याची तयारी दर्शवली आहे.
यूएनचा इशारा
दक्षिण लेबणोन मध्ये इस्रायल सेफ/बफर झोन तयार करत असल्याच्या वृत्तावर युनाइटेड नॅशन्स च्या मदत विभाग प्रमुखांनी तीव्र आक्षेप नोंदवला आहे. या निर्णयामुळे परिस्थिती आणखी चिघळू शकते, असा इशारा देण्यात आला आहे.
ब्रिटनची चिंता
दरम्यान केईर स्टार्मर यांनी या संघर्षाचा परिणाम ब्रिटनच्या भविष्यातील अर्थव्यवस्था आणि सुरक्षेवर होऊ शकतो, अशी भीती व्यक्त केली आहे. त्यांनी हॉर्मुझ सामुद्रधुनीवरील तणाव कमी करण्यासाठी ३५ देशांना चर्चेसाठी आमंत्रित केले आहे.
इराणमध्ये तणाव वाढला
इस्रायलने इराणमधील वरिष्ठ नेते कमल खराझी यांच्या घरावर हल्ला केल्याची माहिती समोर आली आहे. या हल्ल्यात त्यांच्या कुटुंबातील काही जणांचा मृत्यू झाल्याचे वृत्त आहे. यानंतर इराणने इस्रायलवर मिसाईल हल्ले तीव्र केले असून Tel Avivवर सतत हल्ले सुरू आहेत.
एकूण स्थिती
अमेरिका, इस्रायल आणि इराण यांच्यातील संघर्ष दिवसेंदिवस गंभीर होत असून दोन्ही बाजूंना मोठ्या प्रमाणावर फटका बसत आहे. अशा परिस्थितीत कतारची मध्यस्थी आणि आंतरराष्ट्रीय स्तरावरील प्रयत्न युद्ध थांबवण्यात किती यशस्वी ठरतात, हे पाहणे महत्त्वाचे ठरणार आहे.
