---Advertisement---
राज्यातील शेतकऱ्यांसाठी मोठी दिलासादायक बातमी समोर आली आहे. राज्य सरकारने शेतकरी कर्जमाफीबाबत महत्त्वाचा निर्णय जाहीर केला आहे. मुख्यमंत्री देवेंद्र फडणवीस यांनी विधानसभेत अर्थसंकल्प सादर करताना ‘पुण्यश्लोक अहिल्याबाई होळकर शेतकरी कर्जमाफी योजना’ जाहीर केली. या योजनेअंतर्गत पात्र शेतकऱ्यांना २ लाख रुपयांपर्यंत पीक कर्जमाफी देण्यात येणार आहे.
विधानसभा निवडणुकीदरम्यान महायुती सरकारने शेतकऱ्यांना कर्जमाफीचे आश्वासन दिले होते. त्या पार्श्वभूमीवर हा निर्णय अत्यंत महत्त्वाचा मानला जात आहे. राज्यातील अनेक शेतकरी कर्जाच्या ओझ्याखाली दबलेले असल्याने या घोषणेमुळे त्यांना मोठा दिलासा मिळणार असल्याची अपेक्षा व्यक्त केली जात आहे.
मुख्यमंत्री फडणवीस यांनी अर्थसंकल्पीय भाषणात सांगितले की, राज्यातील ३० सप्टेंबर २०२५ पर्यंत थकीत असलेल्या पीक कर्जावर पात्र शेतकऱ्यांना या योजनेचा लाभ दिला जाणार आहे. यासाठी सरकारने विशेष समिती स्थापन केली असून पात्रतेचे निकष आणि अंमलबजावणीची प्रक्रिया लवकरच जाहीर केली जाणार आहे.
सरकारने केवळ कर्जमाफीवरच भर दिलेला नाही, तर नियमित कर्जफेड करणाऱ्या शेतकऱ्यांनाही प्रोत्साहन देण्याचा निर्णय घेतला आहे. ज्या शेतकऱ्यांनी वेळेवर कर्जफेड केली आहे, अशा शेतकऱ्यांना ५० हजार रुपयांपर्यंत प्रोत्साहनपर लाभ दिला जाणार असल्याची घोषणा मुख्यमंत्री फडणवीस यांनी केली.
गेल्या काही दिवसांपासून राज्यात शेतकरी कर्जमाफीचा मुद्दा चांगलाच चर्चेत होता. विरोधकांकडूनही याबाबत सातत्याने मागणी केली जात होती. अखेर सरकारने अर्थसंकल्पात ही मोठी घोषणा केल्याने राज्यातील लाखो शेतकऱ्यांना मोठा दिलासा मिळणार आहे.
दरम्यान, या योजनेची अंमलबजावणी कशी होणार, कोणते शेतकरी पात्र ठरणार आणि अर्जाची प्रक्रिया काय असेल याबाबतची सविस्तर माहिती लवकरच सरकारकडून जाहीर केली जाणार आहे.
