लक्ष्मीनगर, सम्राट कॉलनी, सिंधी कॉलनी परिसरातील नागरिकांचा कचरा संकलन केंद्र विरोधात नाराजी

जळगाव : जळगाव शहरातील प्रभाग क्र. १६ मध्ये कचरा संकलन केंद्र उभारण्यात येणार आहे. या विरोधात लक्ष्मीनगर, सम्राट कॉलनी, सिंधी कॉलनी आदी परिसरातील नागरिकांनी नाराजी व्यक्त करीत महानगरपालिकेच्या अतिरिक्त आयुक्त निर्मला गायकवाड यांची भेट घेऊन निवेदन दिले.

जळगाव मनपातर्फे सम्राट कॉलनी, रिलायन्स पेट्रोल पंपासमोर, वडेश्वर महादेव मंदिराजवळ कचरा संकलन केंद्र सुरू करण्यात येणार होते. सदर कचरा संकलन केंद्राने परिसरातील रहिवाश्यांना दुर्गंधी व सांडणाऱ्या कचऱ्याचा सामना करावा लागेल तसेच त्यांचे आरोग्य याने धोक्यात येऊ शकते.

सदर परिसर हा दाट वस्तीचा असून बाजूलाच आंगणवाडी शाळा व रहिवास परिसर असून सर्वांना याचा मोठ्या प्रमाणात त्रास होईल हे लक्षात घेऊन महानगरपालिकेने सदर कचरा केंद्र दुसऱ्या ठिकाणी स्थलांतरीत करावे याविषयाचे निवेदन अतिरिक्त आयुक्त निर्मला गायकवाड यांना परिसरातील नागरिकांनी दिले.

यावेळी तेजस श्रीश्रीमाळ, प्रसन्ना बागूल, निलेश चव्हाण, जितू परदेशी, विक्की महाले, उमेश कोळी, कैलास चौधरी, संकेत बागूल, गौरव नाथ, उषाबाई चौधरी, लताबाई जोशी, आशा सोनवणे, सुनिता परदेशी, सुनिल शिंदे आदी उपस्थित होते. या निवेदनाची प्रत आमदार सुरेश भोळे यांनासुद्धा देण्यात आली. याविषयी नागरिकांच्या भावना लक्षात घेता आमदार सुरेश भोळे आयुक्त यांच्याशी दूरध्वनीवर चर्चा करून सदर कचरा केंद्र दुसऱ्या ठिकाणी हालविण्यासंदर्भात सूचना दिल्या.