---Advertisement---
Dharangaon News: मोबाईलवर रील (व्हिडिओ) बनवण्याचा मोह दोन तरुणांच्या जिवावर बेलता आहे. धावत्या रेल्वेसमोर धोकादायक पद्धतीने रील शूट करत असताना अहमदाबाद हावडा एक्स्प्रेसने धडक दिल्याने दोन मित्रांचा जागीच मृत्यू झाला आहे. अत्यंत दुर्देवी अशी ही घटना धरणगाव तालुक्यातील पाळधी चांदसर रेल्वे गेटजवळ रविवारी २६ ऑक्टोबर रोजी सकाळी ११ वाजेच्या सुमारास घडली. प्रशांत पवन खैरनार (वय १८ वर्षे) आणि हर्षवर्धन महेंद्र नन्नवरे (वय १८ वर्षे) अशी दोघं मयतांची नावे आहेत. दोघेही पाळधी येथील महात्मा फुले नगर, प्लॉट भाग (रेल्वे, गेट जवळील प्लॉट) येथील रहिवासी होते.
याबाबात पोलिसांकडून मिळालेल्या माहितीनुसार, प्रशांत पवन खैरनार आणि हर्षवर्धन महेंद्र नन्नवरे हे दोघे रविवारची सुट्टी असल्याने पाळधी चांदसर रेल्वे गेटजवळ असलेल्या रेल्वे ट्रॅकवर आले होते. मोबाईलवरील लोकप्रिय अॅपसाठी अधिक आकर्षक आणि धोकादायक ठरेल असा व्हिडिओ (रील) तयार करण्याचा त्यांचा प्रयत्न होता. हे रील बनवत असताना धरणगावकडून जळगावकडे जाणाऱ्या अहमदाबाद-हावडा एक्स्प्रेस गाडीची त्यांना धडक बसली. हा अपघात इतका भीषण होता की दोन्ही तरुणांना बचाव करण्याची संधी मिळाली नाही आणि त्यांचा जागीच मृत्यू झाला.
या घटनेची माहिती मिळताच पाळधी पोलीस तातडीने घटनास्थळी दाखल झाले आणि त्यांनी पंचनामा करत मृतदेह शवविच्छेदानासाठी रवाना केला. या दुःखद घटनेमुळे पाळधी परिसरात मोठी हळहळ व्यक्त होत आहे.
