---Advertisement---
श्रीनगर : जम्मू आणि काश्मीरमधील श्रीनगर पोलिसांनी दहशतवाद्यांना मदत करणाऱ्या चार ओव्हर ग्राऊंड वर्कर्सना (ओजीडब्ल्यू) अटक केली आहे. अटक केलेल्यांमध्ये एका महिलेचा समावेश आहे. या महिलेचे नाव शाझिया आहे. इतर आरोपींमध्ये जहर अहमद मीर, बशीर अहमद भट आणि गुलाम मोहम्मद भट यांचा समावेश आहे. हे सर्व श्रीनगरच्या हजरतबल येथील रहिवासी असून त्यांना बुधवारी रात्री अटक करण्यात आली.
ओव्हर ग्राऊंड वर्कर्स हे लपलेल्या दहशतवाद्यांसाठी डोळे आणि कान म्हणून काम करतात. त्यांना रसद पुरविण्याचे त्यांचे उद्दिष्ट असते. त्यांच्याकडून मोठ्या प्रमाणात शस्त्रे आणि दारूगोळा जप्त करण्यात आला. यात एक हँड ग्रेनेड, अनेक गोळ्या, मोबाईल फोन आणि रोख रकमेचा समावेश आहे. याप्रकरणी पोलिसांनी आरोपींवर बेकायदेशीर कृत्य प्रतिबंधक कायद्या (यूएपीए) अंतर्गत गुन्हा दाखल केला आहे.
पंजाबमधून तिघांना घेतले ताब्यात
जम्मू आणि काश्मीर, पंजाब, हरयाणा आणि राजस्थानमध्ये पसरलेल्या लष्कर-ए-तोयबाच्या एका मोठ्या आंतरराज्यीय मॉड्यूलचा पर्दाफाश करण्याच्या सुरू असलेल्या तपासादरम्यान ही अटक झाली आहे. श्रीनगरचे एसएसपी जी. व्ही. संदीप चक्रवर्ती यांच्या देखरेखीखाली श्रीनगर पोलिसांच्या विशेष पथकांनी वर नमूद केलेल्या चारही राज्यांमध्ये छापे टाकले. या छाप्यांदरम्यान सुरक्षा दलांनी पंजाबमधील मालेरकोटला येथील त्यांच्या लपण्याच्या ठिकाणाहून अब्दुल्ला उर्फ अबू हुरैरा आणि उस्मान उर्फ खुबैब या दोन पाकिस्तानी नागरिकांसह तीन लष्कर दहशतवाद्यांना अटक केली.
चौथा साथीदार पळून जाण्यात यशस्वी
तपासात असे आढळून आले की, अनेक वर्षांच्या प्रत्यक्ष जमिनीवरील कामामुळे मजबूत झालेल्या या दोघांना भारतावर दहशतवादी कारवाया करण्यासाठी पाकिस्तानातील त्यांच्या तळावरून तैनात केले जात होते. तथापि, नियंत्रण रेषा आणि आंतरराष्ट्रीय सीमेवर वाढलेल्या सुरक्षा निगराणीमुळे देशाबाहेर जाण्यासाठी पासपोर्टसह कागदपत्रे मिळवण्याकरिता त्यांनी बनावट ओळख धारण केली होती. मात्र, त्यांचा चौथा साथीदार, उमर उर्फ खरगोश बनावट कागदपत्रांचा वापर करून भारतातून पळून जाण्यात यशस्वी झाला.
