---Advertisement---
जळगाव शहरात शिवजयंतीनिमित्त स्वराज्याच्या सेनानींच्या वंशजांच्या उपस्थितीत भव्य महोत्सव साजरा करण्यात आला. मराठा प्रीमियर लीग आणि नूतन मराठा महाविद्यालयाच्या वतीने आयोजित या कार्यक्रमाला विशेष ऐतिहासिक महत्त्व प्राप्त झाले.
या महोत्सवासाठी श्रीमंत हरजीराजे महाडिक यांचे वंशज कृष्णराजे महाडिक तसेच श्रीमंत कान्होजी जेधे देशमुख यांचे वंशज रणधीर जेधे देशमुख यांची प्रमुख उपस्थिती होती. त्यांच्या उपस्थितीमुळे कार्यक्रमाला वेगळेच आकर्षण लाभले.
कार्यक्रमात शिवकालीन शस्त्र आणि दुर्मिळ ऐतिहासिक दस्तावेजांचे भव्य प्रदर्शन भरविण्यात आले होते. तलवारी, भाले, ढाली तसेच स्वराज्यकालीन कागदपत्रे पाहण्यासाठी नागरिकांनी मोठी गर्दी केली. इतिहासप्रेमी आणि तरुण वर्गाने विशेष उत्साहाने या प्रदर्शनाला भेट दिली.
स्वराज्याच्या सेनानींच्या वंशजांसोबत साजरा करण्यात आलेल्या या शिवजयंती महोत्सवात नागरिकांनी मोठ्या संख्येने सहभाग घेत जल्लोष साजरा केला. देशभक्तीपर घोषणांनी आणि छत्रपती शिवाजी महाराजांच्या जयघोषाने परिसर दुमदुमून गेला.
