---Advertisement---
जळगाव शहरात गुन्हेगारीचे प्रकार वाढत असल्याचे पुन्हा एकदा समोर आले आहे. कोणतेही कारण नसताना दोघा मित्रांवर तिघांनी अचानक हल्ला केल्याची धक्कादायक घटना राजीव गांधी नगर परिसरात घडली असून, या घटनेत एक तरुण गंभीर जखमी झाला आहे.
अक्षय शरद सकट (वय २२, रा. अर्जुन नगर, हरिविठ्ठल नगर) हा आपल्या मित्रासोबत दि. २० जानेवारी रोजी रात्री ११ वाजेच्या सुमारास राजीव गांधी नगर परिसरात असताना तेजस लोंढे, सितेश लोंढे आणि गणेश लोंढे या तिघांनी त्यांना अडवून शिवीगाळ सुरू केली. वादाचे कोणतेही ठोस कारण नसताना या तिघांनी अक्षय व त्याच्या मित्राला बेदम मारहाण केली.
हल्ल्यादरम्यान तेजस लोंढे याने रस्त्यावर पडलेला दगड उचलून अक्षय सकट याच्या डोक्यात जोरात मारला. या हल्ल्यात अक्षय गंभीर जखमी झाला असून त्याला तातडीने उपचारासाठी रुग्णालयात दाखल करण्यात आले.
उपचारानंतर दि. २१ जानेवारी रोजी अक्षय सकट याने रामानंद नगर पोलीस ठाण्यात तक्रार दिली. त्यानुसार संशयित तेजस संजय लोंढे, सितेश भारत लोंढे व गणेश अशोक लोंढे (सर्व रा. राजीव गांधी नगर) यांच्याविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस हवालदार उषा सोनवणे करीत आहेत. दरम्यान, परिसरात कोणतेही कारण नसताना घडलेल्या या हिंसक घटनेमुळे नागरिकांमध्ये भीतीचे वातावरण पसरले आहे.
