---Advertisement---
नवी दिल्ली : मध्यपूर्वेतील तणाव आणि होर्मूझ सामुद्रधुनीतील परिस्थिती गंभीर असतानाही भारतात इंधनाचा कोणताही तुटवडा नाही, अशी स्पष्ट माहिती केंद्र सरकारने दिली आहे. देशात सध्या सुमारे ६० दिवसांचा प्रत्यक्ष इंधनसाठा उपलब्ध असून एकूण राखीव क्षमता तब्बल ७४ दिवसांची आहे.
सोशल मीडियावर देशात केवळ ६ दिवसांचा साठा शिल्लक असल्याच्या अफवा पसरत असल्या तरी त्या पूर्णपणे खोट्या असल्याचे पेट्रोलियम मंत्रालयाने स्पष्ट केले आहे. भारताने इंधन पुरवठ्यासाठी मजबूत आणि विविध स्रोतांवर आधारित धोरण आखले असून, सध्या ४१ हून अधिक देशांकडून कच्च्या तेलाची आयात सुरू आहे.
विशेष म्हणजे, भारतीय तेल शुद्धीकरण प्रकल्प १०० टक्क्यांहून अधिक क्षमतेने कार्यरत आहेत. याशिवाय, पुढील ६० दिवसांसाठी कच्च्या तेलाची खरेदी आधीच निश्चित करण्यात आली आहे, त्यामुळे पुरवठा साखळीवर कोणताही परिणाम होणार नाही
.
सरकारने भुयारी धोरणात्मक साठवणूक, तयार इंधन साठा आणि कच्च्या तेलाचा साठा अशा विविध स्तरांवर सुरक्षितता राखली आहे. त्यामुळे जागतिक संकटाचा परिणाम भारतावर होण्याची शक्यता कमी असल्याचेही स्पष्ट करण्यात आले.
एकंदरीत, भारताकडे सध्या पुरेसा इंधनसाठा उपलब्ध असून नागरिकांनी अफवांवर विश्वास ठेवू नये, असे आवाहन सरकारकडून करण्यात आले आहे.
