जळगाव : एका चोरट्याला रामानंदनगर पोलिसांनी चोरीची दुचाकी घेऊन जात असतांना सापळा रचून आकाशवाणी चौकातून अटक केली आहे. ही कारवाई शुक्रवार, २२ नोव्हेंबर रोजी दुपारी २ वाजेच्या सुमाराला करण्यात आली असून त्याच्याकडून चोरीच्या तीन दुचाकी जप्त करण्यात आल्या आहेत. शोएब हबीब शाह (वय-२५, रा. मास्टर कॉलनी, जळगाव) असे चोरट्याचे नाव आहे.
शहरातील एम.जे. कॉलेज समोर अफसर अहमद शेख मुनीर (रा.अलमास कॉलनी, जळगाव )यांची (एमएच १९ इएल ३८९३) क्रमांकाची दुचाकी पार्किंगला उभी केली केली होती. ही दुचाकी १८ नोव्हेंबर रोजी चोरी झाल्याचा प्रकार घडला होता. याप्रकरणी रामानंदनगर पोलीस स्टेशनमध्ये अज्ञात चोरट्या विरोधात गुन्हा दाखल करण्यात आला होता. या गुन्ह्याचा तपास पोलीस नाईक हेमंत कळसकर हे करत होते.
या गुन्ह्याच्या तपासादरम्यान चोरीला गेलेली दुचाकी ही संशयित आरोपी शोएब हबीब शहा याने चोरी केल्याची माहिती रामानंदनगर पोलीसांना प्राप्त झाली. या गोपनीय माहितीनुसार पोलिसांनी शुक्रवारी ही करावी केली. यावेळी पोलिसांनी आकाशवाणी चौकात सापळा रचला होता. या सापळ्यात चोरीची दुचाकी घेऊन जाणारा शोएब हबीब शहा यास पोलीस पथकाने अटक केली. त्याच्याकडून चोरीची दुचाकी हस्तगत केली. या तपासादरम्यान, शोएबने इतर ठिकाणाहून चोरी केलेल्या दोन मोटारसायकली देखील काढून दिल्या. या दुचाकी त्याने जिल्हापेठ पोलीस ठाणे आणि जळगाव तालुका पोलीस ठाण्याच्या हद्दीतून चोरी केल्याची कबुली दिली आहे. याप्रकरणी त्याच्या विरोधात रामानंदनगर पोलीस ठाण्यात गुन्हा दाखल करण्यात आला आहे.
ही कारवाई रामानंदनगर पोलीस स्टेशनचे पोलीस निरीक्षक राजेंद्र गुंजाळ यांच्या मार्गदर्शनाखाली सहाय्यक फौजदार संजय सपकाळे, पोलीस कॉन्स्टेबल इरफान मलिक, सुशील चौधरी, विनोद सूर्यवंशी, जितेंद्र राजपूत, जितेंद्र राठोड, हेमंत कडसकर, जितेंद्र तावडे, रेवानंद साळुंखे, रवींद्र चौधरी, उमेश पवार, जुलालसिंग परदेशी यांनी केली आहे.
