---Advertisement---
जळगाव : खान्देश आणि मराठवाडा यांना थेट जोडणाऱ्या महत्त्वाकांक्षी जळगाव-जालना रेल्वेमार्ग प्रकल्पाला अखेर गती मिळाली आहे. रेल्वे विभागाने या मार्गाचा प्राथमिक आराखडा तयार केला असून जळगाव ते जालना दरम्यान एकूण १८ थांबे प्रस्तावित करण्यात आले आहेत. विविध ठिकाणी रेल्वे गेट उभारण्याचेही नियोजन करण्यात आले आहे.
प्रस्तावित योजनेनुसार जळगाव जिल्ह्यातील धानवड, सुनसगाव आणि वाकोद येथे ‘हॉल्ट’ची तरतूद करण्यात आली आहे. तसेच नशिराबाद, नेरी आणि पहूर रोड येथे रस्ते क्रॉसिंग प्रस्तावित असून त्या ठिकाणी रेल्वे गेट उभारले जाणार आहेत. स्थानिक नागरिकांची दळणवळणाची सोय आणि सुरक्षितता लक्षात घेऊन हे नियोजन करण्यात आल्याचे सांगितले जात आहे.
दरम्यान, या प्रकल्पासाठी आवश्यक भूसंपादन प्रक्रियेला जिल्हा प्रशासनाने सुरुवात केली आहे. जळगाव शहरालगत असलेल्या महाराष्ट्र औद्योगिक विकास महामंडळ (एमआयडीसी) क्षेत्राला या रेल्वेमार्गाचा विशेष लाभ होणार आहे. औद्योगिक वसाहतीसाठी मालवाहतुकीची थेट सुविधा उपलब्ध झाल्यास उद्योगांना मोठी चालना मिळेल, अशी अपेक्षा व्यक्त होत आहे.
जळगाव ते जालना (१७४ किमी) प्रस्तावित नवीन रेल्वे मार्गावर सुमारे १७ ते १८ स्थानके नियोजित आहेत, जी मराठवाडा आणि उत्तर महाराष्ट्राला जोडतील. या मार्गावर नशिराबाद, पहूर, सिल्लोड, भोकरदन आणि अजिंठा लेणी यांसारख्या प्रमुख ठिकाणांचा समावेश असून, या प्रकल्पामुळे प्रवासाचा वेळ वाचणार आहे.
प्रस्तावित रेल्वे मार्गावरील प्रमुख स्थानके खालीलप्रमाणे आहेत:
१. जळगाव (सुरुवातीचे स्थानक)
२. नशिराबाद
३. धानवड
४. नेरी
५. सुनसगाव बुद्रुक
६. पहूर
७. वाकोद
८. अजिंठा लेणी
९. अन्वी
१०. सिल्लोड
११. भोकरदन
१२. सोयगाव (किंवा केदारखेडा)
१३. केदारखेडा
१४. राजूर
१५. बावने पांगरी
१६. पिंपळगाव
१७. नागेवाडी
१८. दिना गाव
१९. जालना (अंतिम स्थानक)
हा रेल्वेमार्ग पूर्ण झाल्यास खान्देश आणि मराठवाडा दरम्यानचा प्रवास अधिक सुलभ होणार असून व्यापार, उद्योग आणि स्थानिक विकासाला नवी दिशा मिळणार आहे.
