---Advertisement---
राज्य सरकारी नोकरीच्या प्रतीक्षेत असलेल्या तरुण-तरुणींसाठी एक आनंदाची बातमी समोर आली आहे. महिला व बाल विकास मंत्री अदिती तटकरे यांनी विभागांतर्गत तब्बल २ लाख ३२ हजार ८४० विविध पदांच्या भरतीला मंजुरी दिल्याची घोषणा केली आहे. विशेष म्हणजे, तब्बल २३ वर्षांनंतर विभागात एवढ्या मोठ्या प्रमाणावर नियमित पदांची भरती प्रक्रिया राबवण्यात येणार आहे.
भरतीचा तपशील खालीलप्रमाणे:
विभागाच्या सक्षमीकरणासाठी आणि योजनांची प्रभावी अंमलबजावणी करण्यासाठी खालील प्रवर्गात पदे भरली जाणार आहेत:
नियमित पदे: ८ हजार ६६९ (२३ वर्षांनंतरचा ऐतिहासिक निर्णय)
बाह्ययंत्रणेद्वारे पदे: २ हजार ८४३
अंगणवाडी सेविका व मदतनीस: २ लाख २१ हजार ३२८ (मानधनावर आधारित)
अंगणवाडी सेविका: १ लाख १० हजार ६६४ पदे
अंगणवाडी मदतनीस: १ लाख १० हजार ६६४ पदे
विभागाचे सक्षमीकरण होणार
मंत्री अदिती तटकरे यांनी सांगितले की, “हा निर्णय विभागाच्या बळकटीकरणासाठी अत्यंत महत्त्वाचा ठरेल. यामुळे महिला व बाल कल्याणाच्या योजना शेवटच्या घटकापर्यंत अधिक प्रभावीपणे पोहोचवता येतील.” विभागातील एकूण पदांचा आढावा घेऊन, काही जुनी पदे रद्द करून त्याजागी १६५ नवीन पदांची वाढ करण्यात आली असून एकूण ८,६६९ नियमित पदांना मंजुरी देण्यात आली आहे.
तरुणांसाठी मोठी संधी
गेल्या अनेक वर्षांपासून रखडलेल्या या भरती प्रक्रियेमुळे राज्यातील सुशिक्षित बेरोजगारांना सरकारी नोकरी मिळवण्याची सुवर्णसंधी उपलब्ध झाली आहे. या सर्व पदांसाठी लवकरच अधिकृत जाहिरात प्रसिद्ध होऊन भरती प्रक्रिया सुरू करण्यात येणार आहे.
