अट्टल गुन्हेगाराचा दिल्ली पळून जाण्याचा प्लॅन फसला, नंदुरबार पोलीसांनी शिताफीने घेतले ताब्यात

नंदुरबार : घरफोडीतील सराईत आरोपी नंदुरबार शहरातील गुरुकुल नगर परीसरात फिरत असून तो दिल्लीला पळून जाण्याच्या तयारीत असताना पोलीस पथकाने त्यास शिताफिने ताब्यात घेतले.

शहरात झालेल्या घरफोडींचा स्थानिक गुन्हे शाखेकडून समांतर तपास करण्यात येत होता. या तपासादरम्यान स्थानिक गुन्हे शाखेचे पोलीस निरीक्षक हेमंत पाटील यांना शनिवारी (16 ऑगस्ट) गोपनीय माहिती मिळाली. यात घरफोडीतील सराईत आरोपी जिमी ऊर्फ दिपक शर्मा हा नंदुरबार शहरातील गुरुकुल नगर परीसरात फिरत असून तो दिल्लीला पळून जाण्याचे तयारीत आहे. अशी खात्रीशीर माहिती मिळाल्यावर पोलीस अधीक्षक श्रवण दत्त.एस यांचे मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील यांनी शहर पोलीस ठाण्याचे पोलीस निरीक्षक हेमंतकुमार पाटील यांना याबाबत माहिती देऊन दोन वेगवेगळी पथके आरोपीचा शोध घेणेकामी रवाना केले.

स्थानिक गुन्हे शाखा व शहर पोलीस ठाण्याचे पथकांनी मिळालेल्या गोपनिय माहितीप्रमाणे जिमी ऊर्फ दिपक शर्मा याचा शोध घेण्यासाठी सापळा रचला. यानुसार तो गुरुकुल नगर परीसरात फिरतांना आढळून आला. त्यास पोलीस पथकांनी कुठल्याही प्रकारचा संशय न येऊ देता शिताफिने ताब्यात घेतले. त्यास ताब्यात घेऊन नमुद गुन्ह्याबाबत विचारपूस केली असता तो उडवाउडवीचे उत्तरे देऊ लागला. यावेळेस पथकाने जिमीला विश्वासात घेऊन चौकशी केली असता त्याने नमुद गुन्ह्यांची कबूली देऊन हकिगत सांगितली. त्याचप्रमाणे काही दिवसांपूर्वी धुळे जिल्हयातील शिरपूर शहरात 1 व पिंपळनेर येथे 2 अशा घरफोडी देखील केल्या असल्याचे सांगितले.

त्यानुसार दिवसा घरफोडी करणारा जिम्मी ऊर्फ दिपक बिपीन ऊर्फ अरमित शर्मा( वय- 32 वर्षे, रा. प्लॉट नं. 4अ, गुरुकुल नगर, नंदुरबार ता. जि. नंदुरबार) याच्याकडून नमुद गुन्ह्यातील एकुण 6 लाख 27 हजार 500 रुपयांचा मुद्देमाल त्यात सोन्याचे दागिने, मोबाईल व वाहन असा मुद्देमाल जप्त करण्यात आला आहे.

धुळे जिल्हयातील 3 व नंदुरबार शहरातील 1 असे एकुण 4 घरफोडीचे गुन्हे उघड करण्यात नंदुरबार पोलीसांना यश मिळाले आहे. जिम्मीविरुध्द महाराष्ट्रातील विविध जिल्हयात तसेच परराज्यातील गुजरात, हरियाणा, राजस्थान आदी ठिकाणी 60 पेक्षा अधिक गुन्हे दाखल असून त्यास ताब्यात घेण्यात नंदुरबार पोलीसांना यश मिळाले आहे.

हि कामगिरी पोलीस अधीक्षक श्रवण दत्त. एस, अपर पोलीस अधीक्षक आशित कांबळे, उपविभागीय पोलीस अधिकारी, नंदुरबार संजय महाजन यांचे मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, शहर पोलीस ठाण्याचे पोलीस निरीक्षक हेमंतकुमार पाटील, पोउपनि- विकास गुंजाळ, छगन चव्हाण, स्था.गु.शा.चे पोहेकॉ मोहन ढमढेरे, पोना अविनाश चव्हाण, पोशि अभय राजपुत तसेच शहर पोलीस ठाण्याचे पोहेकॉ दिपक बुनकर, नरेंद्र चौधरी, विनोद महाजन, प्रशांत पाटील, पोशि किरण मोरे अशांनी केली आहे.