सणासुदीच्या काळात बाजारात दरवाढीचा स्फोट; गृहिणींचे बजेट कोलमडलं, सर्वच झालं महाग ! जाणून घ्या ?

आगामी सणासुदीच्या काळात बाजारपेठेत किराणा वस्तुंचे भाव वाढल्याने सर्वसामान्य नागरिक चिंतेत आहेत. जीवनावश्यक वस्तूंच्या सतत वाढणाऱ्या दरामुळे सर्वसामान्य नागरिकांचे घरगुती बजेट ढासळले आहे. त्यातच आता मसाले, खाद्यतेल, डाळी आणि इतर किराणा वस्तूंच्या दरात मोठी वाढ झाल्याने ग्राहक चिंतेत आहेत. मागील काही आठवड्यांत अनेक वस्तूंमध्ये १० ते २० टक्क्यांपर्यंत वाढ झाल्याची माहिती बाजारातून मिळत आहे.

सध्या होळी, रमजान आणि लग्नसराईचा हंगाम सुरू असल्याने बाजारात खरेदीसाठी मोठी गर्दी आहे. मात्र या वाढत्या मागणीसोबतच दरातही मोठी वाढ झाली आहे. लाल मिरची, धणे, जिरे, हळद, लवंग, मिरे यांसारख्या मसाल्यांच्या दरात लक्षणीय वाढ झाली असून काही मसाले प्रतिकिलो १०० ते २०० रुपयांनी महाग झाले आहेत. उत्पादन घट, वाढलेला वाहतूक खर्च आणि सणासुदीतील मागणी वाढ ही दरवाढीमागील प्रमुख कारणे मानली जात आहेत.

खाद्यतेल आणि डाळींचाही भाव वाढल्याने सर्वसामान्य नागरिकांचे घरगुती बजेट ढासळले 

तूरडाळ, हरभरा डाळ तसेच सोयाबीन व सूर्यफूल तेलाच्या दरातही वाढ झाली आहे. घाऊक बाजारातील दरवाढीचा थेट परिणाम किरकोळ बाजारात दिसून येत आहे. लग्नसमारंभ आणि जेवणावळींमुळे डाळी व तेलाची मागणी वाढल्याने दर आणखी चढले आहेत.

दरवाढीचा परिणाम लग्नसमारंभांच्या खर्चावरही झाला आहे. केटरिंग सेवांमध्ये प्रति ताट २० ते ३० रुपयांची वाढ झाल्याची माहिती मिळत आहे. त्यामुळे आयोजन करणाऱ्यांचे बजेट कोलमडले असून ग्राहक “स्वस्त काय?” या प्रश्नात अडकले आहेत.

व्यापाऱ्यांच्या मते, सणासुदीचा हंगाम संपल्यानंतर दर काही प्रमाणात स्थिर होऊ शकतात. मात्र जागतिक बाजारपेठेतील चढ-उतार आणि स्थानिक उत्पादनाची परिस्थिती यावर पुढील दर अवलंबून असतील. सध्या मात्र महागाईच्या झळांनी सर्वसामान्यांच्या खिशाला मोठा फटका बसत आहे.

दरम्यान, सतत वाढणाऱ्या महागाईमुळे सर्वसामान्य कुटुंबांना महिन्याचे अर्थकारण सांभाळणे अधिकच कठीण होत आहे. किराणा, मसाले, डाळी आणि खाद्यतेल यांच्या दरवाढीचा थेट परिणाम स्वयंपाकघरावर होत असून बचत तर दूरच, रोजच्या गरजाही भागवणे आव्हानात्मक ठरत आहे. तज्ज्ञांच्या मते, स्थानिक उत्पादनात वाढ, साठेबाजीवर नियंत्रण आणि वाहतूक खर्चात स्थैर्य आल्यासच दर आटोक्यात येऊ शकतात. तोपर्यंत मात्र ग्राहकांना काटकसरीचा मार्ग स्वीकारावा लागणार असून “महागाई कधी आटोक्यात येणार?” हा प्रश्न प्रत्येकाच्या मनात घर करून राहिला आहे.