---Advertisement---
पाचोरा शहरात सध्या अवैध दारू विक्रीचा प्रश्न गंभीर बनताना दिसत आहे. गावठी, देशी आणि विदेशी दारू खुलेआम विकली जात असल्याच्या तक्रारी पुढे येत आहेत. विशेष म्हणजे, या प्रकाराकडे स्थानिक पोलीस प्रशासनाने दुर्लक्ष केल्याची भावना नागरिकांमध्ये वाढत आहे.
शहरातील अनेक भागांत पहाटेपासूनच दारू विक्री सुरू होत असल्याचे चित्र आहे. काही ठिकाणी लोक झोपेतून उठताच थेट दारू घेण्यासाठी जात असल्याचे दिसून येते. यामुळे दारूच्या नशेत रस्त्यावर पडून राहणाऱ्या व्यक्तींची संख्या वाढली आहे, ज्यामुळे सार्वजनिक ठिकाणी अस्वस्थ वातावरण निर्माण होत आहे.
छत्रपती शिवाजी महाराज चौक, नगर पालिका परिसर, बसस्थानकाजवळ, जारगाव चौफुली, कृष्णापुरी चौफुली, शारदा इंग्लिश मिडीयम स्कूल परिसर, तसेच जामनेर रोड आणि भडगाव रोड या भागांत अवैध दारू विक्री सुरू असल्याचे स्थानिकांचे म्हणणे आहे. या सर्व ठिकाणी कारवाईचा अभाव जाणवत असल्याची टीका होत आहे.
या बेकायदेशीर धंद्यामुळे अनेक कुटुंबांवर परिणाम होत असून, अतिमद्यपानामुळे काहींचा मृत्यू झाल्याच्या घटनाही समोर आल्या आहेत. परिस्थिती हाताबाहेर जात असताना, अवैध दारू विक्री थांबवण्यासाठी ठोस पावले उचलण्याची मागणी नागरिकांकडून केली जात आहे.
