---Advertisement---
उच्च न्यायालयाच्या हस्तक्षेपानंतर शासनाची माघार; आरटीई प्रवेशातील तिढा अखेर सुटला
मुंबई/नागपूर | प्रतिनिधी
बालकांच्या मोफत व सक्तीच्या शिक्षण हक्क कायद्याअंतर्गत (RTE) खासगी शाळांमधील 25% राखीव जागांसाठी प्रवेश प्रक्रियेत मोठा बदल करण्यात आला आहे. एक किलोमीटर अंतराची अट हटवण्यात आल्याने आता पालकांना 3 किमी ते 5 किमीपर्यंतच्या शाळांसाठीही अर्ज करता येणार आहे. यामुळे हजारो पालकांना मोठा दिलासा मिळाला आहे.
यापूर्वी RTE प्रवेशासाठी केवळ 1 किमी परिसरातील शाळांनाच प्राधान्य देण्याची अट होती. मात्र ही अट अन्यायकारक असल्याचा आरोप करत ‘आप’ पालक युनियनने आंदोलन केले होते. त्यांनी शासनासह शालेय शिक्षण मंत्री दादा भुसे यांच्याकडे निवेदन देऊन ही अट रद्द करण्याची मागणी केली होती.
दरम्यान, या प्रकरणी नागपूर खंडपीठात जनहित याचिका दाखल करण्यात आली. 9 मार्च रोजी उच्च न्यायालयाने 1 किमी अटीवर स्थगिती देत शासनाला पर्यायी व्यवस्था करण्याचे निर्देश दिले होते.
सुरुवातीला शासनाने सकारात्मक भूमिका घेतली नसली, तरी न्यायालयाच्या आदेशानंतर अखेर माघार घेत सुधारित आदेश जारी करण्यात आले. नव्या निर्णयानुसार आता 1 किमीची मर्यादा काढून टाकत 3 किमी तसेच त्यापुढील अंतरातील शाळांसाठीही अर्ज करता येणार आहे. परिणामी, पालकांना 5 किमीपर्यंतच्या शाळांचा पर्याय उपलब्ध झाला आहे.
महत्त्वाचे काय बदलले?
1 किमी अंतराची अट रद्द
3 किमी व त्यापुढील शाळांसाठी अर्ज करता येणार
5 किमीपर्यंतच्या शाळांचा पर्याय खुला
पालकांना अधिक पर्याय, प्रवेश प्रक्रिया सुलभ
या निर्णयामुळे विशेषतः शहरी व उपनगरातील पालकांना मोठा फायदा होणार असून, गुणवत्तापूर्ण शिक्षणासाठी अधिक पर्याय उपलब्ध होणार आहेत.
