पाचोरा : शहरातील जारगाव चौफुली येथे पोलिसांनी एका संशयितला दोन गावठी कट्टे आणि चार जीवंत काडतुशांसह अटक केली आहे. याप्रकरणी पाचोरा पोलीस ठाण्यात गुन्हा दाखल करण्यात आला आहे.
पाचोरा पोलीस स्टेशनचे पोलीस निरीक्षक अशोक पवार यांना गुप्त बातमीदाराकडून माहिती मिळाली की, जारगाव चौफुली परिसरात एक इसम गैरकायदेशीर गावठी कट्टे घेऊन फिरत आहे. या माहितीच्या आधारे, पोहेकॉ राहुल शिंपी आणि पोकॉ दिनेश पाटील यांनी स्थानिक दोन पंचांच्या उपस्थितीत सापळा टाकून कारवाई करण्याचा निर्णय घेतला.
पोलीसांनी जारगाव चौफुली येथील ए वन काटा परिसरात छापा टाकला. यावेळी संशयित अरबाज खान जहुर खान (वय २४ वर्षे) रा. अक्सा नगर, जारगाव ता. पाचोरा याच्या कंबरेजवळ त्याच्या पॅन्टच्या खिशात हात घालत असल्याचे पाहून पो. काॅ. दिनेश पाटील यांनी त्याचे दोन्ही हात दाबून धरले. अंगझडती दरम्यान त्याच्या पॅन्टच्या खिशातून प्रत्येकी २० हजार रुपये किंमतीचे दोन गावठी कट्टे आणि २ हजार रुपये किंमतीचे चार जीवंत काडतुसे सापडले.
या प्रकरणी पाचोरा पोलिस ठाण्यात गुन्हा नोंदविण्यात आला असून, पुढील तपास पोलीस निरीक्षक अशोक पवार यांच्या मार्गदर्शनाखाली पोलिस उपनिरीक्षक प्रकाश चव्हाणके करीत आहेत.
