नंदुरबार रेल्वे स्टेशनला टर्मिनलचा दर्जा मिळणार ? व्यवस्थापकांकडे निवेदन सादर…!

उत्तर महाराष्ट्रातील वाढती प्रवासी संख्या आणि रेल्वे सुविधांची गरज लक्षात घेता नंदुरबार रेल्वे स्थानकाला टर्मिनलचा दर्जा देण्याची मागणी जोर धरू लागली आहे. यासंदर्भात प्रवासी संघटनांनी Western Railway च्या Mumbai Central railway station विभागीय व्यवस्थापकांकडे निवेदन सादर केले आहे.

पश्चिम रेल्वे विभागीय रेल्वे वापरकर्ता सल्लागार समितीचे सदस्य महेंद्र कोठारी यांनी दिलेल्या माहितीनुसार, नंदुरबारला टर्मिनलचा दर्जा मिळाल्यास उत्तर, पूर्व आणि दक्षिण दिशेला नवीन लांब पल्ल्याच्या गाड्या सुरू करण्यास मोठी संधी उपलब्ध होईल. सध्या अनेक गाड्या उधना आणि भुसावळ दरम्यान मर्यादित असल्याने उत्तर महाराष्ट्रातील प्रवाशांना सातत्याने अडचणींचा सामना करावा लागत आहे. टर्मिनल झाल्यास काही गाड्यांचे उगमस्थान नंदुरबार ठेवता येईल. त्यामुळे प्रवासाची सुरुवात नंदुरबारहून होऊन गर्दीच्या हंगामात होणारी झुंबड कमी होईल, असा दावा करण्यात आला आहे.

गुजरातमधील उधना स्थानकावर आधीच प्रवासी व मालवाहतुकीचा मोठा ताण आहे. अनेक गाड्यांचे टर्मिनेशन तेथे होत असल्याने फलाट आणि यार्ड व्यवस्थापनावर अतिरिक्त दबाव निर्माण होतो. नंदुरबार येथे टर्मिनल उभारल्यास काही गाड्यांचे उगमस्थान बदलून उधना स्थानकावरील भार कमी करता येईल आणि वेळापत्रक अधिक सुटसुटीत करता येईल, असा विश्वास व्यक्त करण्यात आला आहे.

नंदुरबार-भुसावळ दरम्यान सध्या धावणाऱ्या मेमू गाड्यांची संख्या अपुरी असल्याची तक्रार प्रवासी संघटनांनी केली आहे. भुसावळ ते नंदुरबार या पट्ट्यात दररोज नोकरी, व्यवसाय, शिक्षण आणि वैयक्तिक कारणांसाठी मोठ्या प्रमाणात प्रवासी प्रवास करतात. त्यामुळे भुसावळमार्गे धरणगाव, अमळनेर, नरडाणा, शिंदखेडा, दोंडाईचा आणि नंदुरबार दरम्यान स्वतंत्र प्रवासी गाड्या सुरू करण्याची मागणी पुढे आली आहे.

नंदुरबार टर्मिनल झाल्यास स्थानिक व्यापार, कृषी उत्पादनांची वाहतूक आणि औद्योगिक मालवाहतूक यांना गती मिळू शकते. उत्तर महाराष्ट्र व सीमावर्ती भागाला थेट रेल्वे जोडणी मजबूत झाल्यास प्रादेशिक विकासाला चालना मिळेल, असा विश्वास व्यक्त करण्यात आला आहे.

दरम्यान, या प्रस्तावावर सकारात्मक निर्णय होण्याची अपेक्षा प्रवासी संघटनांनी व्यक्त केली आहे. पश्चिम रेल्वेकडून या मागणीचा अभ्यास करून पुढील कार्यवाही केली जाईल, अशी शक्यता वर्तवली जात आहे.

एकूणच, नंदुरबार टर्मिनलचा प्रस्ताव मंजूर झाल्यास उत्तर महाराष्ट्राच्या रेल्वे नकाशात महत्त्वपूर्ण बदल घडू शकतो.