देव दर्शनासाठी निघालेल्या तरुणांना डंपरची धडक, एक ठार एक गंभीर

जळगाव : मित्रांसह देव दर्शन घेण्यासाठी निघालेल्या दुचाकीस्वार तरुणांचा अपघात झाला. या अपघातात एक जण मृत्युमुखी पडला असून त्याचा मित्र गंभीर जखमी झाला आहे. ही घटना शनिवारी (दि. १९) सकाळी ६ वाजेच्या सुमारास नशिराबाद गावाजवळील टोलनाक्याजवळील पुलाजवळ घडली. मृत तरुणाचे नाव हर्षल राजू पाटील (वय १९, रा. वराड, ता. धरणगाव) असे आहे. तर गंभीर जखमी झालेल्या मित्राचे नाव कुणाल गोकुळ पाटील (रा. वराड, ता. धरणगाव) असे आहे.

याबाबतचे वृत्त असे की, आज शनिवारी (दि. १९) रोजी पहाटे धरणगाव तालुक्यातील वराड येथील ८ ते १० मित्र हे देवदर्शनासाठी निघाले होते. ते सर्वं बोदवड तालुक्यातील शिरसाळा येथील प्रसिद्ध मारुती मंदिराच्या दर्शनासाठी जात होते. हे सर्व दुचाकीवर दर्शनासाठी निघाले होते. ते नशिराबाद गावाजवळील टोलनाका शेजारी असलेल्या पुलावरुन जात होते. याचे वेळी त्यांच्या दुचाकीला भरधाव वेगात येणाऱ्या डंपरने त्यांना जबर धडक दिली. ही धडक एवढी जोरदार होती की या धडकेत हर्षलचा जागीच मृत्यू ओढवला.

यावेळी त्याच्या मागे बसलेला कुणाला पाटील हा गंभीर जखमी झाला. त्याला तातडीने खासगी रुग्णालयात उपचारासाठी दाखल करण्यात आले आहे. हर्षल हा एकुलता एक मुलगा असल्याने घटनेनंतर घरात शोककळा पसरली आहे. तो आई-वडील व बहिणीसोबत राहत होता. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली असून नशिराबाद पोलीस पुढील तपास करत आहेत.