जळगावात शिंदेसेनेचा विजयरथ सुसाट; आणखी एक उमेदवार बिनविरोध

जळगाव : महानगरपालिका निवडणुकीत शिंदेसेनेने आपली पकड अधिक मजबूत केली असून, पक्षाची बिनविरोध विजयाची घोडदौड सातत्याने सुरूच आहे. उमेदवारी अर्ज मागे घेण्याच्या पहिल्याच दिवशी तीन उमेदवारांची बिनविरोध निवड निश्चित झाली आहे. प्रभाग क्रमांक 18-अ मधून गौरव चंद्रकांत सोनवणे, प्रभाग क्रमांक 9 ‘अ’ मधून मनोज चौधरी आणि आता प्रभाग 9 ‘ब’मध्ये प्रतिभा देशमुख यांची बिनविरोध निवड निश्चित झाली आहे.

प्रभाग 9 ‘ब’ मधून अपक्ष उमेदवार प्रतिभा पाटील यांनी माघार घेतल्याने प्रतिभा देशमुख या बिनविरोध झाल्या आहेत. याआधी प्रभाग क्रमांक 9 ‘अ’ मधून मनोज चौधरी बिनविरोध झाले आहे. त्यांचे प्रतिस्पर्धी अपक्ष उमेदवार राहुल लोखंडे यांनी माघार घेतल्याने चौधरी हे बिनविरोध झाले आहेत.

प्रभाग क्रमांक 18-अ मधून उद्धवसेनेचे उमेदवार मयूर चंद्रशेखर सोनवणे यांनी आपला उमेदवारी अर्ज मागे घेतल्याने गौरव चंद्रकांत सोनवणे यांची बिनविरोध निवड निश्चित झाली आहे.

अन् उज्ज्वला बेंडाळे बिनविरोध

प्रभाग १२ ‘ब’ ओबीसी महिला या प्रवर्गातून भाजपच्या उज्ज्वला बेंडाळे यांनी उमेदवारी अर्ज दाखल केला. त्यांच्याविरोधात वैशाली पाटील आणि भारती चोपडे यांनी उमेदवारी अर्ज दाखल केले.

यातील वैशाली पाटील यांनी इतर आणखी दोन प्रभागांत अर्ज दाखल केले आणि भारती चोपडे यांनी अर्ज भरताना त्यात त्रुटी ठेवल्या. त्यामुळे भारती चोपडे यांचा अर्ज छाननीत बाद ठरविण्यात आला, तर वैशाली पाटील यांनी दाखल केलेल्या इतर दोन प्रभागांपैकी दुसऱ्या प्रभागात आधी अर्ज दाखल केला.

त्यामुळे निवडणूक निर्णय अधिकाऱ्यांनी दुसऱ्या प्रभागातीमल अर्ज ग्राह्य धरीत १२ ‘ब’मधील अर्ज तांत्रिकदृष्ट्या निवडणूक निर्णय अधिकारी जितेंद्र कुवर यांनी बाद ठरविला.

त्यामुळे प्रभाग १२ ‘ब’मध्ये केवळ भाजपच्या उज्ज्वला बेंडाळे यांचा एकमेव अर्ज राहिल्याने त्यांची निवड बिनविरोध निश्चित झाली. या वेळी मोहन बेंडाळे, भाजपचे महानगर-जिल्हाध्यक्ष दीपक सूर्यवंशी, अरविंद देशमुख, दीपमाला काळे, पिंटू काळे यांच्यासह समर्थकांनी जल्लोष केला.