---Advertisement---
शहरातील मुख्य बस स्थानकावर एनसीएमसी (National Common Mobility Card) कार्डसाठी बसविण्यात आलेली मशीन वारंवार बंद पडत असल्यामुळे नागरिकांना मोठा त्रास सहन करावा लागत आहे. विशेषतः ज्येष्ठ नागरिकांना उन्हात तासन्तास रांगेत उभे राहावे लागत असून त्यांच्या आरोग्यावर याचा विपरीत परिणाम होत आहे.
बस स्थानकावर कार्ड काढण्यासाठी आणि रिचार्जसाठी येणाऱ्या नागरिकांची संख्या मोठी आहे. मात्र उपलब्ध मशीन अनेकदा बंद अवस्थेत असल्याने कामकाज ठप्प होते. परिणामी लांबच लांब रांगा लागतात आणि नागरिकांची गैरसोय होते.
याशिवाय, स्थानक परिसरात पिण्याच्या पाण्याची योग्य व्यवस्था नसल्याने प्रवासी अधिक त्रस्त होत आहेत. उन्हाळ्याच्या तीव्रतेत पाण्याअभावी ज्येष्ठ नागरिकांना विशेषतः त्रास सहन करावा लागत आहे. बसण्याची आणि सावलीची अपुरी व्यवस्था हीदेखील एक मोठी समस्या ठरत आहे.
स्थानिक नागरिकांनी प्रशासनाकडे वारंवार तक्रारी करूनही अद्याप ठोस उपाययोजना करण्यात आलेली नाही. त्यामुळे संबंधित विभागाने तात्काळ लक्ष देऊन मशीनची दुरुस्ती, अतिरिक्त सुविधा आणि पिण्याच्या पाण्याची व्यवस्था करावी, अशी मागणी नागरिकांकडून होत आहे.
