---Advertisement---
नागपूर : चांदवड येथील शेतकरी मोर्चात बोलताना काँग्रेस प्रदेशाध्यक्ष हर्षवर्धन सपकाळ यांनी पंतप्रधान नरेंद्र मोदी आणि उपमुख्यमंत्री देवेंद्र फडणवीस यांच्यावर अत्यंत अश्लाघ्य आणि अश्लील शब्दांत आगपाखड केली होती. यावरून राज्यातील राजकीय वातावरण कमालीचे तापले आहे. भाजपचे ज्येष्ठ नेते तथा राज्याचे महसूल मंत्री चंद्रशेखर बावनकुळे यांनी नागपुरात बोलताना सपकाळांच्या या टीकेचा तीव्र समाचार घेतला. “हर्षवर्धन सपकाळ यांनी आपली भाषा सुधारली नाही, तर भाजपचा एकही कार्यकर्ता त्यांना महाराष्ट्रात कुठेही फिरू देणार नाही,” असा थेट आणि कडक इशारा बावनकुळे यांनी दिला आहे.
सपकाळ यांनी विरोधी बाकावर असल्याच्या वैफल्यातून आणि भ्रमनिरासातून गावागावात तेढ निर्माण करून समाजातील वातावरण खराब करण्याचा प्रयत्न सुरू केला आहे, असा आरोपही बावनकुळे यांनी केला.
…तर दुष्काळी परिस्थितीत विधान परिषद निवडणूक बिनविरोध व्हावी!
या पत्रकार परिषदेत चंद्रशेखर बावनकुळे यांनी आगामी विधान परिषद निवडणुकीवर महत्त्वपूर्ण भाष्य केले. ते म्हणाले:
जागावाटप ९९% पूर्ण: महायुतीच्या जागावाटपाची चर्चा ९९ टक्के पूर्ण झाली असून, येत्या एक-दोन दिवसांत तिन्ही पक्षांचे प्रमुख नेते एकत्र बसून यावर अंतिम शिक्कामोर्तब करतील. जागावाटपाच्या बैठकीसाठी दिल्लीला जाण्याची गरज नाही.
काँग्रेसला बिनविरोधचे आवाहन: विधान परिषदेच्या विविध मतदारसंघांत भाजप आणि मित्रपक्षांचे जवळपास ७० टक्क्यांपर्यंत मतदार आहेत. त्यामुळे उन्हाळ्याच्या आणि दुष्काळाच्या या कठीण काळात काँग्रेसने अनावश्यक खर्च टाळून ही निवडणूक बिनविरोध करावी, अशी माझी त्यांना विनंती आहे. गरज भासल्यास मी स्वतः काँग्रेस नेत्यांशी चर्चा करेन.
तटकरे-भुजबळ वादाच्या वृत्तावर बावनकुळेंचे स्पष्टीकरण
नुकत्याच पार पडलेल्या राष्ट्रवादी काँग्रेसच्या अंतर्गत बैठकीत सुनील तटकरे आणि छगन भुजबळ यांच्यात वाद झाल्याच्या वृत्ताचा बावनकुळे यांनी स्पष्ट शब्दांत इन्कार केला. “छगन भुजबळ काल रात्री उशिरापर्यंत माझ्यासोबतच होते. त्यामुळे राष्ट्रवादीच्या बैठकीत वाद झाल्याची बातमी प्रसारमाध्यमांकडे कुठून आली, हे मला माहीत नाही. असा कोणताही वाद झाला असेल असे मला वाटत नाही,” असे म्हणत त्यांनी महायुतीत सर्वकाही आलबेल असल्याचे संकेत दिले.
नेमकं काय म्हणाले होते हर्षवर्धन सपकाळ? (ज्यावरून वाद पेटला)
चांदवड येथील सभेत बोलताना काँग्रेस प्रदेशाध्यक्ष हर्षवर्धन सपकाळ यांनी सरकारवर अत्यंत तिखट शब्दांत हल्ला चढवला होता. त्यांच्या भाषणातील मुख्य आक्षेपार्ह मुद्दे खालीलप्रमाणे होते:
फडणवीसांवर टीका: “सरकार तुपाशी आणि शेतकरी उपाशी अशी सध्याची अवस्था आहे. फडणवीस हे गद्दार माणूस आहेत. त्यांनी २४ रुपयांनी कांदा खरेदीचे आश्वासन दिले होते. तसेच वेगळा विदर्भ झाल्याशिवाय लग्न करणार नाही असे सांगून नंतर लग्न केले. त्यामुळे ते महाराष्ट्राचे खोटारडे मुख्यमंत्री आहेत.”
पंतप्रधान मोदींवर निशाणा: “मोदींनी आजूबाजूच्या देशांसोबत भांडणे लावून ठेवली आहेत. ते जोपर्यंत खुर्चीवर आहेत तोपर्यंत कांदा निर्यात होणार नाही. मोदींमुळे आपले कधीच चांगले होऊ शकत नाही. अशा खोट्या सरकारला आणि मोदींना बैलगाडीत बसवून त्यांची हिमालयात विल्हेवाट लावली पाहिजे,” अशा अत्यंत खालच्या पातळीवर जाऊन सपकाळ यांनी टीका केली होती. या विधानांमुळेच आता भाजप सपकाळांविरोधात आक्रमक झाला आहे.
