---Advertisement---
30 जून 2026 नंतर इंडेन, भारत गॅस आणि HP गॅसचे LPG कनेक्शन बंद करण्यात येणार असल्याचा दावा सोशल मीडियावर मोठ्या प्रमाणात व्हायरल होत आहे. मात्र हा दावा चुकीचा असून सर्वसामान्य घरगुती गॅस ग्राहकांनी घाबरण्याचे कोणतेही कारण नसल्याचे स्पष्ट झाले आहे.
अमेरिका-इराण तणाव आणि होर्मूझ समुद्रधुनीवरील परिस्थितीमुळे काही काळ व्यावसायिक LPG पुरवठ्यावर परिणाम झाला होता. त्यानंतर सरकार आणि तेल विपणन कंपन्यांनी काही नवीन नियम लागू केले. याच पार्श्वभूमीवर सोशल मीडियावर “30 जूननंतर सर्व LPG कनेक्शन बंद होणार” असा गैरसमज पसरला.
प्रत्यक्षात, हा नियम फक्त अशा ग्राहकांसाठी लागू आहे ज्यांच्या परिसरात पाइपद्वारे नैसर्गिक वायू (PNG) सुविधा उपलब्ध आहे आणि ज्यांनी PNG कनेक्शन स्वीकारले आहे. अशा ग्राहकांना PNG सुरू झाल्यानंतर 30 दिवसांच्या आत त्यांचे जुने LPG सिलेंडर आणि कनेक्शन सरेंडर करणे आवश्यक आहे.
सरकारच्या सुधारित नियमांनुसार, ठराविक कालावधीत LPG कनेक्शन सरेंडर न केल्यास संबंधित ग्राहकांचे LPG खाते बंद होऊ शकते. मात्र हा नियम सर्व LPG ग्राहकांसाठी लागू नसून केवळ PNG सुविधा उपलब्ध असलेल्या आणि PNG स्वीकारलेल्या ग्राहकांपुरताच मर्यादित आहे.
इंडेन, भारत गॅस आणि HP गॅसच्या सर्वसामान्य घरगुती ग्राहकांचा गॅस पुरवठा पूर्ववत सुरू राहणार असल्याचे स्पष्ट करण्यात आले आहे. त्यामुळे सोशल मीडियावरील “30 जूननंतर सर्व LPG कनेक्शन बंद होणार” हा दावा पूर्णपणे दिशाभूल करणारा असल्याचे समोर आले आहे.
