जळगाव : ‘पोलीसानेच चोरी केली’, असं कुणी म्हटलं तर तुम्हाला विश्वास बसणार नाही. पण जळगाव जिल्हयात घडलेल्या घटनेमुळे तुम्हाला विश्वास बसेल हे नक्की. जालना येथे कार्यरत असलेला पोलीस उपनिरीक्षक चक्क जळगावच्या चोपड्यात चोरी करण्यासाठी आल्याचे समोर आले असून, पोलिसांनी चार चोरांना बेड्या ठोकल्या आहेत. दरम्यान, पोलीस उपनिरीक्षक याने चोरी केल्याची कबुली दिली असून, तो राज्यभरातील बसस्थानकावर चोरीचे रॅकेट चालवत असल्याचा पोलिसांना संशय आहे.
पोलीस सूत्रानुसार, चोपडा तालुक्यातील वाळकी येथील शेतकरी वसंत उखा कोळी यांचे ३५ हजार रूपये चोरट्यांनी चोपडा बसस्थानकातून चोरून नेल्याची घटना बुधवारी तीन वाजेच्या सुमारास घडली. घटनेनंतर चोरट्यांनी वापरलेल्या इंडिगो कार (क्र एम एच-४३ एन-२९२८ व) चा पाठलाग करत, पोलिसांनी चोपडा-धरणगाव रस्त्यावर चोरट्यांना कारसह ताब्यात घेतले.
धक्कादायक म्हणजे, या चार चोरांमध्ये जालना येथील पोलिस उपनिरीक्षक प्रल्हाद मान्टे याचा समावेश असल्याचे समोर आल्याने एकच खळबळ उडाली. दरम्यान, पोलीस उपनिरीक्षक प्रल्हाद मान्टे याने चोरी केल्याची कबुली दिली असून, तो राज्यभरातील बसस्थानकावर चोरीचे रॅकेट चालवत असल्याचा पोलिसांना संशय आहे.
प्रल्हाद मान्टे तीन महिन्यांनी होणार होते सेवानिवृत्त
चोरटा पोलीस उपनिरीक्षक प्रल्हाद मान्टे हा तीन महिन्यांनी सेवानिवृत्त होणार होता. मात्र त्यापूर्वी तो चोपडा बसस्थानकावर चोरी करण्यासाठी आला. दरम्यान, त्याला चोरी प्रकरणात अटक झाल्याने एकच खळबळ उडाली आहे.
चोरीचे रॅकेट चालवत असल्याचा संशय
दरम्यान, पोलीस उपनिरीक्षक प्रल्हाद मान्टे हा राज्यभरातील बसस्थानकावर चोरीचे रॅकेट चालवत असल्याचा पोलिसांना संशय आहे. पकडले जावू नये म्हणून प्रल्हाद मान्टे हा कधीही हॉटेल किंवा लॉजवर थांबत नसल्याची माहिती समोर आली आहे. तसेच त्याच्या कारमधून स्वयंपाक बनवण्याचे साहित्य, अंथरूण-पांघरून ताब्यात घेण्यात आले आहे.
चोपडा शहर पोलीस ठाण्याचे पोलीस निरीक्षक मधुकर साळवे पीएसआय जितेंद्र वल्टे, एकनाथ भिसे व पोलिस कर्मचारी रितेश चौधरी, तसेच स्थानिक गुन्हे शाखेचे पोलीस उपनिरीक्षक गणेश वाघमारे, विलेश सोनवणे, दीपक माळी, रवींद्र पाटील, पोलिस नाईक हेमंत पाटील यांनी ही कारवाई केली आहे. पोलिस उपनिरीक्षक जितेंद्र वल्टे हे या प्रकरणाचा तपास करीत आहेत.
