जळगाव : आरोग्यसेवक पदाकरिता बनावट नियुक्ती आदेश तयार केल्याचा गंभीर प्रकार उघड झाला आहे. प्रकाराने जिल्हा परिषद परिसरात खळबळ उडाली आहे. या प्रकरणी शहर पोलिस ठाण्यात फसवणुकीचा गुन्हा दाखल करण्यात आला आहे.
जिल्हा आरोग्य अधिकाऱ्यांचा बनावट शिक्का तसेच स्कॅन केलेली सही वापरून आरोग्यसेवक पदाचा बोगस नियुक्ती आदेश तयार केल्याचा गंभीर प्रकार घडला आहे.
नुकतीच शासनाच्या सार्वजनिक आरोग्य विभागातर्फे आरोग्य सेवक पदासाठी भरती प्रक्रिया पार पडली आहे. या भरती प्रक्रियेत निवड झालेल्या उमेदवारांचे अधिकृत नियुक्तीचे आदेश संकेत स्थळांवर जारी करण्यात आले. यासोबतच उमेदवारांना यासंदर्भात ईमेलद्वारे कळविण्यात आले. दरम्यान, भुसावळ मधील जुना सातारा येथील अमोल कैलास सुशीर याने या अधिकृत आदेशाचा संदर्भ घेत स्वतःचा बनावट नियुक्ती आदेश तयार केला. हा नियुक्ती आदेश तयार करतांना अमोलने सार्वजनिक आरोग्य विभागासह जिल्हा आरोग्य अधिकाऱ्यांचा शिक्का यासोबतच त्यांची स्कॅन केलेली सही वापरली. मुक्ताईनगर पंचायत समितीच्या कार्यलयीन अधीक्षकांनी हा बनावट आदेश जिल्हा परिषदेच्या सहायक प्रशासन अधिकाऱ्यांच्या व्हॉट्सअॅपवर पाठवला. यानंतर हा गंभीर प्रकार समोर आला. बनावट व मूळ आदेशात तफावत आढळून आली आहे. अमोल सुशीरने हा बनावट आदेश घेऊन जिल्हा परिषदेत अद्यापही हजर झाला नाही.
परंतु, त्याने बनावट सही आणि शिक्के वापरून शासनाची फसवणूक केल्याप्रकरणी जिल्हा आरोग्य अधिकारी डॉ. सचिन भायेकर यांनी शहर पोलिस ठाण्यात तक्रार दाखल केली. यानुसार पोलिसांनी अमोल सुशीरविरुद्ध गुन्हा नोंदवला असून पुढील तपास सुरू आहे.
