आई आणि पत्नी वरच्या मजल्यावर असतांना तरुणाने गळफास घेत जीवन यात्रा संपवली

जळगाव : जळगाव शहरातील रामेश्वर कॉलनी परिसरात एका विवाहित तरुणाने राहत्या घरात गळफास घेत आपली जीवन यात्रा संपविली. बुधवारी (१८ जुलै) रोजी त्याची आई व पत्नी वरच्या मजल्यावर असतांना सायंकाळी ५ वाजेच्या सुमारास त्याने आत्महत्या केली. याबाबत एमआयडीसी पोलिसांत अकस्मात मृत्यूची नोंद करण्यात आली आहे. कृष्णा रामदास पाटील (वय ४२) असे मयत तरुणाचे नाव आहे.

बुधवारी १५ जुलै रोजी सायंकाळी ५ वाजेच्या सुमारास कृष्णा यांची आई आणि पत्नी घराच्या वरच्या मजल्यावर गेल्या होत्या. याच वेळी कृष्णा पाटील घराच्या खालच्या खोलीत एकटे असताना, त्यांनी राहत्या घराच्या खालच्या खोलीत गळफास घेतला. घरातील सदस्यांना ते गळफास घेतलेल्या अवस्थेत दिसताच, त्यांच्या आईने केलेला हृदय हेलावणारा आक्रोश ऐकून शेजारी मदतीला धावले.

त्यांनी तात्काळ कृष्णा यांना शासकीय वैद्यकीय महाविद्यालयात उपचारासाठी दाखल केले. मात्र, वैद्यकीय अधिकाऱ्यांनी त्यांना मृत घोषित केले. कृष्णा पाटील यांच्या आत्महत्येमागील नेमके कारण अद्याप समोर आलेले नाही. या घटनेमुळे संपूर्ण कुटुंबावर आणि परिसरात शोककळा पसरली आहे. या प्रकरणी एमआयडीसी पोलीस ठाण्यात आकस्मिक मृत्यूची नोंद करण्यात आली आहे-