---Advertisement---
अॅग्रीकल्चर ट्रेडिंग आणि तंत्रज्ञान क्षेत्रात काम करणाऱ्या ‘एव्ही पॉलिमर्स लिमिटेड’ने आर्थिक वर्ष 2025-26 मध्ये उल्लेखनीय आर्थिक कामगिरी नोंदवली आहे. कंपनीचा निव्वळ नफा तब्बल 25 पट वाढत 20.33 कोटी रुपयांवर पोहोचला आहे. या वाढीच्या पार्श्वभूमीवर कंपनीने एआय वापरून हेल्थ-टेक आणि अॅग्री-टेक क्षेत्रात प्रवेश करण्याचा निर्णय घेतला आहे.
या आर्थिक वर्षात कंपनीने एकूण 312 कोटी रुपयांचा महसूल मिळवला. मागील वर्षी याच कालावधीत कंपनीचा नफा फक्त 81 लाख रुपये होता, तो आता मोठ्या झेपेसह 20.32 कोटी रुपयांपर्यंत गेला आहे. ही वाढ कंपनीच्या कार्यक्षम व्यवस्थापन आणि योग्य धोरणांचा परिणाम मानली जाते. चौथ्या तिमाहीत कंपनीचा महसूल 150.28 कोटी रुपये इतका नोंदवला गेला असून, निव्वळ नफ्यात 46.1 टक्क्यांची वाढ दिसून आली आहे.
कंपनीने आपली आर्थिक स्थिती अधिक मजबूत करण्यासाठी राइट्स इश्यूद्वारे 89.99 कोटी रुपये उभारले. या इश्यूला गुंतवणूकदारांकडून चांगला प्रतिसाद मिळाला. यामुळे कंपनीची नेटवर्थ 35.67 कोटी रुपयांवरून वाढून 115.99 कोटी रुपये झाली आहे. विशेष म्हणजे, कंपनी आता पूर्णपणे कर्जमुक्त झाली असून भविष्यातील विस्तारासाठी तिच्याकडे पुरेसे भांडवल उपलब्ध आहे.
व्यवस्थापकीय संचालक चिंतन पटेल यांनी सांगितले की, चालू आर्थिक वर्ष कंपनीसाठी बदलाचे ठरले. पारंपरिक ट्रेडिंगपुरते मर्यादित न राहता कंपनी आता तंत्रज्ञानाधारित व्यवसायांवर अधिक भर देत आहे.
कंपनीने ‘कृषीबडी’ हे एआयवर आधारित अॅप आधीच सुरू केले आहे. या अॅपमुळे शेतकऱ्यांना पिकांचे नियोजन, आंतरराष्ट्रीय बाजाराची माहिती आणि संभाव्य नफ्याचा अंदाज मिळण्यास मदत होते.
याच आठवड्यात कंपनी ‘एव्ही हेल्थ एआय’ हा नवीन प्लॅटफॉर्म सादर करणार आहे. या प्लॅटफॉर्मवर रिअल-टाइम वेलनेस विश्लेषण आणि एआयच्या मदतीने निदान सुविधा उपलब्ध असणार आहे.
दरम्यान, कंपनीने सध्या नफ्याचा वापर विस्तार आणि एआय पायाभूत सुविधांमध्ये गुंतवणुकीसाठी करण्याचा निर्णय घेतला आहे. त्यामुळे या तिमाहीत लाभांश जाहीर करण्यात आलेला नाही. भविष्यात डिजिटल प्लॅटफॉर्ममधून स्थिर उत्पन्न मिळू लागल्यानंतर लाभांशाबाबत निर्णय घेतला जाईल, असे कंपनीच्या संचालक मंडळाने स्पष्ट केले आहे.
