---Advertisement---
एरंडोल : पाचोरा तालुक्यातील शेवाळे येथे एका वृद्ध महिलेच्या डोक्यात लोखंडी रॉड टाकून तिचा खून करण्यात आला होता. ही घटना ताजी असतांना एरंडोल तालुक्यातून देखील एक धक्कादायक घटना उघड झाली आहे. आज मंगळवारी (१७ जून) रोजी एका १३ वर्षीय मुलाचा गळा चिरलेला अवस्थेतील मृतदेह खर्ची गावाजवळ आढळून आला आहे. हा मुलगा रिंगणगाव येथून बेपत्ता झाला होता. या घटनेने जिल्हात खळबळ उडाली आहे. एरंडोल पोलीस अधिक तपस करीत आहेत. तेजस गजानन महाजन (वय १३, रा. रिंगणगाव ता. एरंडोल) असे मृत बालकाचे नाव आहे.
तेजस महाजन हा रिंगणगाव येथे आपल्या कुटुंबियांसोबत वास्तव्याला होता. त्याच्या कुटूंबात आई, वडील, मोठी बहीण यांचा समावेश आहे. त्याचे वडील गजानन महाजन हे शेती कामांसोबतच हार्डवेअरचे दुकान चालवून आपला चरितार्थ चालवतात. गजानन हे सोमवारी ( १६ जून ) जळगावला कामानिमित्त गेले होते. दरम्यान, त्यांनी तेजस यास दुकानावर बसविले होते. तेजस हा दुकान बंद करून घरी जाणे कुटुंबीयांना अपेक्षित होते. मात्र , तेजस घरी परतलाच नाही.
यामुळे त्यांच्या कुटुंबीयांनी त्याचा शोधा सुरू केला. सर्वत्र शोधून देखील तेजस न मिळाल्याने कुटुंबीयांनी एरंडोल पोलीस स्थानकात तक्रार दाखल केली. यानंतर पोलिसांनी निरीक्षक निलेश गायकवाड यांच्या मार्गदर्शनाखाली तपासचक्र फिरवीत तेजसचा शोध रात्रभर सुरू ठेवण्यात आला होता.
अखेर मंगळवारी (१७ जून ) रोजी सकाळी ८ वाजेच्या सुमारास एरंडोल तालुक्यातील खर्ची गावाजवळ निंबाळकर यांच्या शेतामध्ये १३ वर्षीय मुलाचा मृतदेह गळा चिरलेल्या अवस्थेत असल्याची माहिती एरंडोल पोलिसांना काही ग्रामस्थांनी दिली. पोलिसांनी घटनास्थळी जाऊन खात्री केली असता मृतदेह तेजस महाजन याचाच असल्याचे स्पष्ट झाले. या घटनेमुळे कुटुंबीयांना जबर धक्का बसला आहे. घटनास्थळी मोबाईल फॉरेनसिक व्हॅन दाखल झाली असून तपास सुरू झाला आहे. दरम्यान बालकाची हत्या करण्यामागील कारण काय याबाबतचा तपास पोलीस करत असून काही इसमांची संशयित म्हणून धरपकड केली असल्याची माहिती मिळत आहे. खुनाच्या घटनेमुळे पुन्हा एकदा जिल्हा हादरला आहे.
