Crime News : परतवाडा पोलीस ठाण्यात ७ एप्रिल रोजी दाखल झालेल्या जबरी चोरीच्या गुन्ह्यातील आरोपी मझर अब्बास जाफर ईरानी याला भुसावळ येथील मुस्लिम कॉलनीतून बाजारपेठ पोलिसांनी अटक केली. फिर्यादी महिलेच्या गळ्यातील १ लाख १७ हजार रुपये किमतीचे मंगळसूत्र हिसकावून मोटारसायकलवरून त्याने पलायन केले होते.
फिर्यादी महिला तिच्या पतीसोबत मंदिरात जात असताना दोन अनोळखी इसमांनी अचानक तिच्या गळ्यातील मंगळसूत्र हिसकावून धूम ठोकली होती. सीसीटीव्ही फुटेजच्या आधारे आरोपींची ओळख पटवण्यात आली. तपासाअंती, ५ मे रोजी परतवाडा (जि. अमरावती) येथील अधिकारी व कर्मचारी बाजारपेठ पोलीस ठाण्यात आले असता, पोलीस निरीक्षक राहुल वाघ यांच्या मार्गदर्शनाखाली पो. है. कॉ. विजय नेरकर, पो. कॉ. प्रशांत परदेशी, योगेश माळी, जावेद शहा, अमर आढळे, सचिन चौधरी आणि भूषण चौधरी यांच्या पथकाने संयुक्त कारवाई करत आरोपी अब्बास जाफर ईरानी याला मुस्लिम कॉलनी, भुसावळ येथून ताब्यात घेतले. या गुन्ह्यात वापरलेली मोटारसायकल ५ एप्रिल रोजी मुक्ताईनगर येथून चोरीस गेलेली असून, या वाहनाबाबत मुक्ताईनगर पोलीस ठाण्यात गुन्हा दाखल करण्यात आला आहे.
