---Advertisement---
अकोला जिल्ह्यातून एक गंभीर आणि धक्कादायक प्रकार समोर आला असून, पोलीस कोठडीत असलेल्या एका महिलेकडून पोलिस अधिकाऱ्यावर गैरवर्तनाचा आरोप करण्यात आला आहे. या घटनेमुळे कायद्याच्या रक्षकांवरच प्रश्नचिन्ह उपस्थित झाले आहे.
मिळालेल्या माहितीनुसार, फसवणुकीच्या प्रकरणात अटक करण्यात आलेल्या महिलेला न्यायालयाने पोलीस कोठडी सुनावली होती. त्यानंतर तिला अकोल्यातील सिव्हिल लाईन पोलीस ठाण्यात ठेवण्यात आले होते. याच ठिकाणी कार्यरत असलेल्या एका पोलिस अधिकाऱ्याने अनुचित मागणी केल्याचा आरोप संबंधित महिलेने केला आहे.
महिलेने ही बाब महिला पोलीस कर्मचाऱ्यांच्या निदर्शनास आणून दिल्यानंतर प्रकरण वरिष्ठ अधिकाऱ्यांपर्यंत पोहोचले. त्यानंतर तातडीने चौकशी सुरू करण्यात आली. या घटनेचा एक व्हिडिओही समोर आला असून, त्यात वरिष्ठ अधिकारी संबंधित कर्मचाऱ्याला जाब विचारताना दिसत आहेत.
दरम्यान, या आरोपांची गंभीर दखल घेत संबंधित पोलिस अधिकाऱ्याला निलंबित करण्यात आल्याची माहिती समोर आली आहे. सध्या या प्रकरणाची सखोल चौकशी सुरू असून, महिलेने केलेले आरोप कितपत सत्य आहेत याची खातरजमा केली जात आहे.
या घटनेमुळे पोलीस यंत्रणेच्या कार्यपद्धतीवर प्रश्न उपस्थित होत असून, अशा प्रकारांना आळा घालण्यासाठी कठोर कारवाईची मागणी होत आहे.
