जामनेर : कापसाने भरलेल्या चालत्या ट्रॅक्टरमधून अचानक धूर निघू लागल्याने ट्रॅक्टर चालकाचे नियंत्रण सुटून अपघात झाल्याची घटना घडली आहे. या अपघातात ट्रॅक्टर पुलाच्या खाली पलटी झाला. यात ७ जणांना गंभीर दुखापत झाली. तसेच ट्रॅक्टरमधील कापूस जळून खाक झाला. गावकऱ्यांनी अपघातस्थळाकडे धाव घेत जखमींना तात्कळ दवाखान्यात दाखल केले.
याबाबत अधिक माहिती अशी की, किशोर दलसिंग परदेशी (रा.पाळधी ता. जामनेर )यांच्या शेतातील कापूस वाचनाचे काम पूर्ण झाले. ते शेतातील ५ क्विंटल कापूस ट्रॅक्टरमध्ये भरुन घराकडे निघाले होते. यावेळी त्यांच्या सोबत वैशाली धनगर (वय-२५), स्वाती परदेशी (वय-३२), हिराबाई परदेशी (वय-३५), पूजा परदेशी (वय-१६), योगिता परदेशी (वय-१८), आरती परदेशी (वय-१६) हे देखील होते. त्यांचे ट्रॅक्टर जळगाव छत्रपती संभाजी नगर हायवे रस्त्यावरील नायरा पेट्रोल पंपजवळ आले असता ट्रॅक्टरमधून अचानक धूर निघाल्याने ट्रॅक्टर पुलाच्या खाली पलटी होऊन अपघात झाला. या अपघातात ट्रॅक्टरमधील सर्व ७ जण हे जखमी झाले असून त्यांना पुढील उपचारासाठी दवाखान्यात दाखल करण्यात आले आहे. तर या आगीत ट्रॅक्टर व ५ क्विंटल कापूस पुर्णपणे जळून खाक झाला आहे.
या अपघाताची माहिती मिळताच पहूर पोलिसांनी घटनास्थळी भेट देऊन पाहणी केली आहे. तसेच गावात या अपघाताची माहिती कळताच गावातील रवींद्र परदेशी, गणेश माळी,पवन परदेशी, ग्रामपंचायत सदस्य देवचंद परदेशी, पन्नालाल परदेशी, सागर परदेशी, दिपक परदेशी, आकाश परदेशी, शालिक परदेशी, कैलास परदेशी व मित्र परिवार यांनी ट्रॅक्टरची आग विझविण्यात मदत करत जखमींना रुग्णालयात हलविण्यात सहकार्य केले.
