---Advertisement---
जळगाव : शहरात गुन्हेगरीचे प्रमाण वाढले आहे. शहरात छोटे-मोठे वाद नित्याचे झाले आहेत. यातच रामानंद नगर पोलीस स्टेशनच्या हद्दीत बुधवारी रात्रीच्या सुमारास दोन तरुणांनी गोळीबार केल्याची खळबळजनक घटना उघड झाली आहे. घटनास्थळी रामानंद नगर पोलीस पोहचले असून त्यांनी चौकशी सुरू केली आहे. याप्रकरणात अद्याप कोणताही गुन्हा दाखल करण्यात आलेला नाही.
मिळालेल्या माहितीनुसार, कोल्हे नगर परिसरात १०० फुटी रोडजवळ सपकाळे यांचा परिवार भाड्याच्या घरात राहतो. त्यांच्याच ओळखीतील दोन तरुण रात्रीच्या सुमारास त्या ठिकाणी आले होते. काहीही कारण नसताना रात्री २ वाजेच्या सुमारास त्यांनी दारूच्या नशेत घरात गोळीबार केला.
परंतु, रात्रभर याबाबत कुणालाही माहिती नव्हती. गुरुवारी दुपारच्या सुमारास याबाबत वाच्यता झाल्यानंतर रामानंदनगर पोलीस ठाण्याचे पोलीस निरीक्षक राजेंद्र गुंजाळ यांच्यासह कर्मचाऱ्यांनी घटना घडलेल्या घरी भेट दिली. पोलिसांनी घरातून एक रिकामी पुंगळी हस्तगत केली आहे. दरम्यान, याप्रकरणी अद्याप पोलिसात गुन्हा दाखल करण्यात आला नसला तरी पोलिसांनी संशयितांचा शोध सुरू केला आहे.
