---Advertisement---
जिल्हा परिषदेच्या नवनियुक्त मुख्य कार्यकारी अधिकारी (CEO) करिश्मा नायर यांनी पदभार स्वीकारताच प्रशासकीय कामकाजात शिस्त आणि गती आणण्यासाठी भेटींचा धडाका सुरू केला आहे. मंगळवार, ५ मे रोजी त्यांनी रावेर तालुक्याचा धावता दौरा करत पंचायत समितीपासून ते थेट ग्रामपंचायतीपर्यंतच्या कामकाजाची प्रत्यक्ष पाहणी केली.
दौऱ्यातील महत्त्वाचे टप्पे:
पंचायत समिती, रावेर: कार्यालयातील प्रलंबित फाईल्स आणि आस्थापना विषयांचा आढावा घेत त्यांनी कर्मचाऱ्यांना कामात गतिमानता आणण्याचे निर्देश दिले.
पशुवैद्यकीय दवाखाना: जनावरांच्या उपचाराबाबत कोणतीही हयगय नको, अशा सूचना देत सेवांचा दर्जा सुधारण्यावर भर दिला.
ऐनपूर ग्रामपंचायत व आरोग्य केंद्र: आरोग्य केंद्रातील औषध साठा आणि रुग्णांना मिळणाऱ्या सुविधांची त्यांनी बारकाईने चौकशी केली.
सोलर प्रकल्प पाहणी: ऐनपूर येथील पर्यावरणपूरक सोलर प्रकल्पाचे त्यांनी कौतुक करत अशा उपक्रमांना जिल्ह्यात प्राधान्य दिले जाईल, असे संकेत दिले.
”प्रशासकीय पारदर्शकता आणि सर्वसामान्यांची कामे वेळेवर होणे ही आमची प्राथमिकता आहे. या भेटी केवळ पाहणीसाठी नसून कामात गुणवत्ता आणण्यासाठी आहेत.”
नवनियुक्त सीईओंच्या या ‘सरप्राईज व्हिजिट’मुळे रावेर तालुक्यातील शासकीय यंत्रणेची चांगलीच धावपळ उडाली. कामकाजात कुचराई करणाऱ्या अधिकाऱ्यांचे धाबे दणाणले असून, जिल्हा परिषदेच्या कारभारात आता ‘करिश्मा’ दिसणार असल्याची चर्चा जिल्हाभरात रंगली आहे. नायर यांनी आगामी काळातही असेच दौरे सुरू ठेवण्याचे संकेत दिल्याने प्रशासकीय वर्तुळात सतर्कता वाढली आहे.
