---Advertisement---
मुंबई:
महाराष्ट्र विधान परिषदेच्या नऊ जागांसाठी निवडणूक जाहीर होताच राज्याच्या राजकारणात मोठ्या घडामोडींना वेग आला आहे. महायुतीच्या जागावाटपात मुख्यमंत्री एकनाथ शिंदे यांच्या शिवसेनेच्या वाट्याला दोन जागा मिळण्याची शक्यता वर्तवण्यात येत आहे. मात्र, या केवळ दोन जागांवरून आता शिंदे गटात अंतर्गत मतभेद आणि नाराजीचे सूर उमटू लागले आहेत.
मिळालेल्या माहितीनुसार, शिंदे गटाकडून विधान परिषदेसाठी खालील आठ नेत्यांच्या नावांची प्राथमिक चर्चा सुरू आहे:
१. नीलम गोऱ्हे
२. रवींद्र फाटक
३. संजय मोरे
४. किरण पावसकर
५. शीतल म्हात्रे
६. शायना एनसी
७. दीपक सावंत
८. बच्चू कडू
यामध्ये सध्या विधान परिषदेच्या उपसभापती पदावर असलेल्या नीलम गोऱ्हे आणि अलीकडेच मुख्यमंत्र्यांची भेट घेतलेले बच्चू कडू यांची नावे आघाडीवर मानली जात आहेत.
पक्षांतर्गत विरोध आणि आव्हाने
पक्षातील या नावांवरून जुन्या नेत्यांमध्ये अस्वस्थता निर्माण झाली आहे. पक्षात आता ‘नव्या चेहऱ्यांना’ संधी मिळावी, असा एक गट आग्रही आहे. विशेषतः बच्चू कडू यांच्या नावाला पक्षांतर्गत मोठा विरोध होताना दिसत आहे. कडू यांनी गेल्या काही काळात महायुती सरकारवर केलेली सडकून टीका आणि वेळोवेळी घेतलेली विरोधी भूमिका यामुळे शिवसेनेचे अनेक नेते नाराज आहेत.
तसेच, पक्षफुटीच्या काळात त्यांनी केलेल्या काही विधानांमुळेही आमदारांमध्ये त्यांच्या उमेदवारीबाबत प्रतिकूल मत आहे.
विधानसभा निवडणुकीच्या पार्श्वभूमीवर पक्षातील असंतोष शमवणे आणि मित्रपक्षांना सोबत घेऊन चालणे, हे मुख्यमंत्री एकनाथ शिंदे यांच्यासमोर मोठे आव्हान आहे. बच्चू कडू यांना उमेदवारी देऊन मित्रपक्षाची साथ कायम ठेवायची की, पक्षातील निष्ठावंतांना संधी देऊन नाराजी दूर करायची, अशा कात्रीत शिंदे सापडले आहेत.
एकूणच, विधान परिषदेच्या या निवडणुकीने शिंदे गटातील अंतर्गत खळबळ समोर आणली असून, आगामी काळात याचे परिणाम महायुतीच्या राजकारणावरही होण्याची शक्यता राजकीय विश्लेषकांनी वर्तवली आहे.
