---Advertisement---
जळगाव जिल्ह्यातील हजारो शेतकऱ्यांसाठी अत्यंत महत्त्वाची घडामोड समोर आली आहे. ‘शेतकरी कर्ज निवृत्ती योजना २०२३’ अंतर्गत जिल्ह्यातील तब्बल २६,०३१ शेतकऱ्यांची कर्जमाफी सध्या तांत्रिक कारणांमुळे रखडली आहे. आवश्यक कागदपत्रे वेळेत न दिल्यामुळे ही प्रक्रिया अडचणीत सापडली असून संबंधित शेतकऱ्यांना आता तातडीने हालचाल करावी लागणार आहे.
मिळालेल्या माहितीनुसार, अनेक शेतकऱ्यांनी आधार कार्डाची प्रत आणि बँक खात्याचा तपशील अद्याप सादर केलेला नाही. परिणामी, जिल्हा मध्यवर्ती सहकारी बँकेच्या पोर्टलवर त्यांची नोंदणी पूर्ण होऊ शकलेली नाही. तांत्रिक पडताळणी प्रक्रिया अपूर्ण राहिल्याने कर्जमाफीची रक्कम पुढे सरकलेली नाही.
जिल्हा मध्यवर्ती सहकारी बँकेकडून ७, १४ आणि १७ फेब्रुवारी रोजी जाहीर आवाहन करण्यात आले होते. मात्र, त्यानंतरही अपेक्षित प्रतिसाद मिळाला नसल्याचे समोर आले आहे. त्यामुळे बँकेने आता कठोर भूमिका घेतली आहे.
कर्जमाफी साठी ‘हे काम त्वरित करा, अन्यथा…’
बँकेच्या अधिकाऱ्यांनी स्पष्ट इशारा दिला आहे की, संबंधित शेतकऱ्यांनी तात्काळ आधार कार्डाची प्रत आणि बँक खाते क्रमांकाचा पुरावा (पासबुक किंवा रद्द केलेला धनादेश) आपल्या गावातील विविध कार्यकारी सहकारी संस्थेत किंवा जवळच्या शाखेत जमा करावा. वेळेत कागदपत्रे न दिल्यास कर्जमाफीचा लाभ कायमस्वरूपी रद्द होऊ शकतो. अशा परिस्थितीत बँक किंवा सोसायटी कोणतीही कायदेशीर जबाबदारी स्वीकारणार नसल्याचे स्पष्ट करण्यात आले आहे.
विशेषतः जळगाव जिल्ह्यातील जामनेर आणि चाळीसगाव तालुक्यांतील शेतकऱ्यांवर याचा सर्वाधिक परिणाम होण्याची शक्यता व्यक्त केली जात आहे. या भागातील प्रकरणांची संख्या लक्षणीय असल्याचे समजते.
शेतकऱ्यांनी कर्जमाफीसाठी काय करावे?
- आधार कार्डाची स्पष्ट प्रत तयार ठेवा
- बँक खात्याचा पुरावा (पासबुक/चेक) सोबत ठेवा
- आपल्या सोसायटी किंवा जिल्हा बँकेच्या शाखेत त्वरित भेट द्या
- नोंदणी स्थितीची खात्री करून घ्या
कर्जमाफीचा लाभ मिळवण्यासाठी ही अंतिम संधी ठरू शकते. त्यामुळे संबंधित शेतकऱ्यांनी विलंब न करता आवश्यक कागदपत्रे सादर करणे अत्यावश्यक आहे.
