चॉपर सह फिरणाऱ्या हद्दपारास एमआयडीसी पोलिसांनी केली शिताफीने अटक

जळगाव : शहरातून हद्दपार करण्यात आलेल्या गुन्हेगाराला बेकायदेशीररीत्या शस्त्र बाळगल्याप्रकरणी सोमवारी (२८ जुलै ) एमआयडीसी पोलिसांनी अटक केली आहे. पवन उर्फ बद्या दिलीप बाविस्कर (वय २५, रा. पिपल बँकेच्या समोर, तुकारामवाडी, जळगाव) असे अटक करण्यात आलेल्या गुन्हेगाराचे नाव आहे. त्याच्या ताब्यातून एक लोखंडी चॉपर जप्त करण्यात आले आहे.

पोलीस निरीक्षक बबन आव्हाड यांनी एमआयडीसी पोलिसांना त्यांच्या हद्दीतून हद्दपार केलेला आरोपी पवन उर्फ बद्या दिलीप बाविस्कर हा सम्राट कॉलनी परिसरात हत्यारासह फिरत आहे. याबाबत खात्री करून कायदेशीर कारवाई करण्याचे आदेश दिले होते. या माहितीनुसार, पोलीस पथकाने तात्काळ खाजगी वाहनाने सम्राट कॉलनी परिसरात आरोपीचा शोध मोहीम राबविली.

या शोध मोहिमेत पथकाला पवन बाविस्कर हा जोशी टेंन्ट हाऊसजवळील गल्लीमध्ये उभा दिसला. पोलिसांना पाहताच तो पळून जाण्याचा प्रयत्न करत असताना, पो.कॉ. योगेश कडुबा घुगे आणि पो.ना. विकास सातदिवे यांनी त्याचा पाठलाग करुन दुपारी १: ३० वाजता त्याला ताब्यात घेतले.

तो हद्दपार असल्याची माहिती असल्याने, त्याला जळगाव जिल्ह्यात प्रवेश करण्याची पोलीस अधीक्षक किंवा महाराष्ट्र शासनाची कोणतीही परवानगी आहे का, असे विचारले असता त्याने परवानगी नसल्याचे सांगितले. पंचांसमक्ष त्याची अंगझडती घेतली असता, त्याच्याकडे अंदाजे १००/- रुपये किमतीचे एक लोखंडी चॉपर आढळून आले. ही कारवाई पो.कॉ. योगेश कडुबा घुगे व त्यांच्या गुन्हे शोध पथकातील पो.उप. निरीक्षक चंद्रकांत धनके, पोहेका. गणेश शिरसाळे, पो. हे. काँ संदीप सपकाळे आणि पो.ना. विकास सातदिवे यांच्या पथकाने केली.