नीट’ पेपरफुटीचे धागेदोरे थेट पुण्यात; ३ नामांकित शिक्षकांना सीबीआयकडून बेड्या, शिक्षण क्षेत्रात खळबळ!

देशभरात खळबळ उडवून देणाऱ्या ‘नीट’ (NEET) परीक्षा पेपरफुटी प्रकरणात केंद्रीय अन्वेषण विभागाने (CBI) अत्यंत धक्कादायक खुलासा केला आहे. शिक्षणाचे माहेरघर मानल्या जाणाऱ्या पुणे शहरात या महाघोटाळ्याची मुख्य पाळेमुळे रुजल्याचे तपासात निष्पन्न झाले आहे. नॅशनल टेस्टिंग एजन्सीमध्ये (NTA) नीट परीक्षेचा पेपर सेट करणे आणि त्याचे भाषांतर करण्याचे काम करणाऱ्या पुण्यातील तीन नामांकित शिक्षकांना सीबीआयने अटक केल्यामुळे संपूर्ण महाराष्ट्रभरातील शिक्षण क्षेत्रात प्रचंड खळबळ उडाली आहे.
​​तपासात उघड झालेली सर्वात थक्क करणारी बाब म्हणजे, अटक करण्यात आलेले हे तिन्ही शिक्षक पुण्याच्या मध्यवर्ती भागातील अवघ्या दीड ते दोन किलोमीटरच्या परिघात असलेल्या शिक्षण संस्थांमध्ये कार्यरत होते. वैद्यकीय प्रवेशासाठी अत्यंत महत्त्वाच्या असलेल्या या परीक्षेत भौतिकशास्त्र (Physics), रसायनशास्त्र (Chemistry) आणि जीवशास्त्र (Biology) हे तीन मुख्य विषय असतात. योगायोगाची गोष्ट म्हणजे सीबीआयच्या जाळ्यात अडकलेले तिन्ही आरोपी याच तीन वेगवेगळ्या विषयांचे तज्ज्ञ आहेत.

​अटक करण्यात आलेल्या ‘गुरुजीं’ची कुंडली
​मनीषा हवालदार (भौतिकशास्त्र): बुधवार पेठेतील ‘शेठ हिरालाल सराफ प्रशाले’त मुख्याध्यापिका म्हणून कार्यरत होत्या. आगामी ३० जून रोजी त्या सेवानिवृत्त होणार होत्या, मात्र त्यापूर्वीच सीबीआयने त्यांना बेड्या ठोकल्या. अटक होताच त्यांच्यावर तात्काळ निलंबनाची कारवाई करण्यात आली आहे.
​मनीषा गाढवे (जीवशास्त्र): शिवाजीनगर परिसरातील नामांकित ‘मॉडर्न महाविद्यालयात’ प्राध्यापिका म्हणून कार्यरत आहेत. त्यांच्याकडे जीवशास्त्राच्या प्रश्नपत्रिकेची जबाबदारी होती.
​प्रा. पी. व्ही. कुलकर्णी (रसायनशास्त्र): डेक्कन भागातील प्रसिद्ध ‘मोटेगावकर क्लासेस’मध्ये अध्यापनाचे काम करत होते. रसायनशास्त्राच्या प्रश्नपत्रिकेचे भाषांतर करण्याचे काम यांच्याकडे होते.
​नवी नावे समोर: मुख्य आरोपींशिवाय या प्रकरणात मनीषा वाघमारे आणि शिवराज मोटेगावकर यांचीही नावे आता सीबीआयच्या अटकेतील आरोपींच्या यादीत समोर आल्याने तपास यंत्रणांच्या संशयाची सुई अधिक गडद झाली आहे.

एकाच शहरातील, शेजारील शिक्षकांचीच निवड का?
​भारतासारख्या विशाल देशात लाखो गुणवंत शिक्षक आणि हजारो नामांकित शैक्षणिक संस्था उपलब्ध आहेत. असे असतानाही, एका अत्यंत महत्त्वाच्या राष्ट्रीय पातळीवरील परीक्षेचे कामकाज हाताळण्यासाठी केवळ एकाच शहरातील आणि त्यातही एकमेकांच्या इतक्या जवळ असलेल्या परिसरातील शिक्षकांचीच निवड का केली गेली? हा सर्वात मोठा आणि संशयास्पद प्रश्न निर्माण झाला आहे.
​या संशयास्पद निवडीमुळे केंद्रीय परीक्षा यंत्रणेच्या (NTA) पारदर्शकतेवरच मोठे प्रश्नचिन्ह उभे राहिले आहे. या संपूर्ण मोठ्या कटामध्ये वरिष्ठ पातळीवरील अधिकाऱ्यांचा किंवा यंत्रणेतील अंतर्गत व्यक्तींचा (Inside Job) मोठा हात असल्याचा दाट संशय व्यक्त केला जात आहे.

​पुणे आता ‘गैरव्यवहाराचे’ केंद्र?
​पुण्याला ‘विद्येचे माहेरघर’ म्हणून संपूर्ण देशात आदराने ओळखले जाते, परंतु दुर्दैवाने आता हेच शहर अशा गंभीर गैरव्यवहारांचे मुख्य केंद्र बनत चालले आहे. यापूर्वी देखील पुण्यात अशा प्रकारच्या परीक्षा घोटाळ्यांच्या घटना घडल्या होत्या, परंतु त्यावेळी कोणतीही मोठी आणि ठोस पावले उचलली गेली नव्हती.

सध्या मात्र केंद्रीय तपास यंत्रणांनी (CBI) तपासाची चक्रे अत्यंत वेगाने फिरवली असून रोज नवनवीन खुलासे होत आहेत. या सर्व प्रकारामुळे परीक्षा आयोजित करणारी संस्था ‘एनटीए’ पूर्णपणे संशयाच्या भोवऱ्यात अडकली आहे. या संपूर्ण रॅकेटच्या मुळापर्यंत पोहोचण्यासाठी आणि लाखो विद्यार्थ्यांच्या भविष्याशी खेळणाऱ्या खऱ्या गुन्हेगारांना हुडकून काढण्यासाठी सीबीआयकडून सध्या कसून चौकशी सुरू आहे.