१ एप्रिल ते ३१ जुलै २०२६ मधील पूजांची होणार नोंदणी; विठ्ठल-रुक्मिणी मातेच्या पूजेची आजपासून ऑनलाईन नोंदणी सुरु- शेळके

पंढरपूर : श्री विठ्ठल-रुक्मिणी मातेच्या नित्यपूजा, पाद्यपूजा आदी विविध पूजांसाठी ऑनलाईन नोंदणी करण्यास दि. ०१ एप्रिल ते ३१ जुलै, २०२६ या कालावधीतील पूजांची नोंदणी आजपासून सुरू करण्यात आली आहे. मंदिर समितीकडून भाविकांना घरबसल्या पूजेची नोंदणी करता येणार असून, यासाठी ऑनलाईन पद्धतीचा अवलंब करण्यात आला आहे.

याबाबत मंदिर समितीच्या दि. ०३ मार्च, २०२४ रोजी झालेल्या बैठकीत हा निर्णय घेण्यात आला होता. पंचायत समितीच्या बैठकीमध्ये मंदिर समितीचे सहअध्यक्ष गहिनीनाथ महाराज औसेकर यांच्या अध्यक्षतेखाली सर्वानुमते हा निर्णय घेण्यात आला होता. या निर्णयाच्या अंमलबजावणीसाठी विशेष संगणक प्रणाली विकसित करण्यात आली आहे, ज्यामुळे नोंदणी प्रक्रिया अधिक सुलभ आणि पारदर्शक झाली आहे.

नोंदणीसाठी https://www.vitthalrukminimandir.org⁠ या अधिकृत संकेतस्थळावर जाऊन भाविकांनी नोंदणी करावी. २०२४ पासून मंदिर समितीने ऑनलाईन पद्धतीने नोंदणी सुरू केली असून, त्याला भाविकांचा मोठा प्रतिसाद मिळत आहे. महाराष्ट्र राज्यातील विविध प्रांत, कोकण विभाग तसेच देशातील कर्नाटक, आसाम, आंध्र प्रदेश इत्यादी राज्यांतील भाविकांनी यापूर्वीही मोठ्या प्रमाणात पूजेची नोंदणी केली होती. यंदाही हीच सुविधा अधिक व्यापक स्वरूपात उपलब्ध करून देण्यात आली आहे.

दि. ०१ एप्रिल ते ३१ जुलै २०२६ या कालावधीत सण, उत्सव, अधिकृत दिवस तसेच इतर नियमित दिवसांसाठी नित्यपूजा, पाद्यपूजा, महापूजा, अभिषेक पूजा, महानैवेद्य, सहभोजन योजना आदी पूजांची नोंदणी करता येणार आहे. याशिवाय माहे एप्रिल २०२५ पासून तुळशी-अर्जुन पूजेची ऑनलाईन नोंदणीसुद्धा भाविकांसाठी उपलब्ध करून देण्यात आलेली आहे.

२०२६ या कालावधीतील पूजांसाठी नोंदणी करताना भाविकांना आपला वेळ निवडण्याची सुविधा उपलब्ध करून देण्यात आली आहे. त्यामुळे गर्दी टाळून नियोजनबद्ध पद्धतीने दर्शन व पूजा करता येणार आहे.

श्री विठ्ठल-रुक्मिणी मंदिरातील नित्यपूजा व इतर पूजांसाठी आकारण्यात येणारे शुल्क पुढीलप्रमाणे आहे-
नित्यपूजा : रु. २५,०००/-
महापूजा : रु. ११,०००/-
पाद्यपूजा : रु. ५,०००/-
अभिषेक पूजा : रु. २,१००/-
महापूजा सहभोजन योजना : रु. ७,०००/- (प्रति कुटुंब)

ऑनलाईन नोंदणी करताना काही अडचण आल्यास मंदिर समितीच्या कार्यालयाशी संपर्क साधण्याचे आवाहन करण्यात आले आहे. अधिक माहिती व मदतीसाठी मंदिर समितीचा दूरध्वनी क्रमांक ०२१८६-२९९२९९ यावर संपर्क साधावा, असेही कार्यकारी अधिकारी राजेंद्र शेळके यांनी सांगितले आहे.

यामुळे भाविकांना घरबसल्या सुलभ पद्धतीने पूजेची नोंदणी करता येणार असून, वेळ व श्रमांची मोठी बचत होणार आहे. गर्दी टाळून नियोजनबद्ध दर्शन व पूजा करता येईल, त्यामुळे आध्यात्मिक समाधान अधिक मिळणार आहे. देश-विदेशातील भाविकांनाही समान संधी उपलब्ध झाल्याने विठ्ठलभक्तीचा प्रसार अधिक व्यापक होईल. ऑनलाईन व्यवस्थेमुळे पारदर्शकता वाढून विश्वासार्हता दृढ होईल, तसेच इच्छित दिवशी व वेळेत पूजा करण्याची सोय मिळाल्याने भाविकांचा अनुभव अधिक समाधानकारक ठरणार आहे.