---Advertisement---
नवी मुंबईतील सरकारी जमिनीशी संबंधित मोठा घोटाळा उघडकीस आला असून, या प्रकरणात भाजप नेते जे.एम. म्हात्रे यांचे नाव समोर आल्याने राजकीय वर्तुळात मोठी खळबळ उडाली आहे. अंमलबजावणी संचालनालयाने (ED) मनी लाँड्रिंग प्रकरणात धडक कारवाई करत आतापर्यंत तब्बल ७० कोटी रुपयांची संपत्ती जप्त केली आहे.
ईडीने सोमवारी जे.एम. म्हात्रे यांच्या मालकीच्या ₹१८ कोटींपेक्षा अधिक किमतीच्या जमिनीचे भूखंड जप्त केले. यामध्ये रायगड जिल्ह्यातील उरण व उलवे परिसरातील स्थावर मालमत्तांचा समावेश आहे. पनवेल तालुक्यातील मौजा वहाळ येथील जमिनींबाबतही तपास सुरू आहे.
ईडीच्या माहितीनुसार, या जमिनी सरकारी नोंदींमध्ये वन विभागाच्या मालकीच्या असल्याचे नमूद आहे. मात्र, या जमिनी बेकायदेशीर पद्धतीने खासगी व्यक्तींच्या नावावर हस्तांतरित करण्यात आल्याचा आरोप आहे. या व्यवहारांमधून कोट्यवधी रुपयांचा आर्थिक घोटाळा झाल्याचा संशय असून त्याचा सखोल तपास ईडीकडून सुरू आहे.
ईडीच्या मुंबई विभागीय कार्यालयाने मनी लाँड्रिंग प्रतिबंधक कायदा (PMLA), 2002 अंतर्गत जे.एम. म्हात्रे यांच्या संपत्तीवर तात्पुरता जप्ती आदेश जारी केला आहे. उरण व उलवे येथील तीन स्थावर मालमत्ता जप्त करण्यात आल्या असून त्यांची अंदाजे किंमत ₹१७.७४ कोटी इतकी आहे. या मालमत्ता जे.एम. म्हात्रे व त्यांच्या पत्नीच्या नावावर असून, त्या बेकायदेशीर आर्थिक व्यवहारांमधून मिळवल्याचा दावा ईडीने केला आहे.
ईडीच्या आदेशानुसार, तपास पूर्ण होईपर्यंत या जमिनी विकता, खरेदी करता किंवा हस्तांतरित करता येणार नाहीत. या प्रकरणात आणखी काही व्यक्तींची नावे समोर येण्याची शक्यता असून, ईडीचा तपास अधिक वेगाने सुरू आहे.
या कारवाईमुळे नवी मुंबईसह राज्यातील राजकीय वर्तुळात तीव्र प्रतिक्रिया उमटत असून, आगामी काळात या प्रकरणात नवे खुलासे होण्याची शक्यता वर्तवली जात आहे.
