---Advertisement---
दक्षिण चित्रपटसृष्टीतील लोकप्रिय जोडी रश्मिका मंदाना (Rashmika Mandanna) आणि विजय देवरकोंडा (Vijay Deverakonda) यांच्या लग्नानंतर आयोजित करण्यात आलेल्या रिसेप्शन सोहळ्यात एक अनपेक्षित प्रकार घडल्याने काही काळ गोंधळाचे वातावरण निर्माण झाले. या कार्यक्रमात एका अज्ञात व्यक्तीने गुपचूप आत प्रवेश करण्याचा प्रयत्न केला. मात्र, कार्यक्रमाच्या प्रवेशद्वारावर तैनात असलेल्या बाउन्सर्सनी त्याला तत्काळ अडवून बाहेर काढल्याचा व्हिडीओ सध्या सोशल मीडियावर वेगाने व्हायरल होत आहे.
२६ फेब्रुवारी रोजी उदयपूर येथे पारंपरिक पद्धतीने विवाहबद्ध झाल्यानंतर या जोडीने ४ मार्च रोजी हैदराबादमध्ये भव्य रिसेप्शनचे आयोजन केले होते. या कार्यक्रमाला दक्षिण चित्रपटसृष्टीतील अनेक नामवंत कलाकार आणि पाहुण्यांची उपस्थिती होती. तसेच या सेलिब्रिटी जोडीची एक झलक पाहण्यासाठी चाहत्यांचीही मोठी गर्दी जमली होती.
याच गर्दीचा फायदा घेत एका अज्ञात व्यक्तीने रिसेप्शनच्या ठिकाणी प्रवेश करण्याचा प्रयत्न केल्याचे समोर आले आहे. सोशल मीडियावर समोर आलेल्या व्हिडीओमध्ये संबंधित व्यक्ती गेटमधून आत जाण्याचा प्रयत्न करताना दिसते. मात्र, सुरक्षा व्यवस्थेत असलेल्या बाउन्सर्सच्या लक्षात हा प्रकार येताच त्यांनी त्याला तात्काळ पकडले.
यानंतर काही क्षणांसाठी हलकी धक्काबुक्की झाल्याचेही व्हिडीओमध्ये दिसते. संबंधित व्यक्ती बाउन्सर्सना काहीतरी समजावण्याचा प्रयत्न करत असल्याचे दिसते, मात्र सुरक्षा कर्मचाऱ्यांनी त्याचे कोणतेही स्पष्टीकरण न ऐकता त्याला कार्यक्रमस्थळाबाहेर काढले.
विशेष म्हणजे, त्या व्यक्तीने व्यवस्थित आणि आकर्षक कपडे परिधान केलेले असल्याचे व्हिडीओमध्ये दिसून येते. त्यामुळे तो पाहुण्यांमध्ये मिसळून आत जाण्याचा प्रयत्न करत होता, असा अंदाज व्यक्त केला जात आहे. मात्र, कडक सुरक्षा व्यवस्थेमुळे त्याचा हा प्रयत्न अपयशी ठरला.
दरम्यान, या घटनेचा व्हिडीओ सोशल मीडियावर मोठ्या प्रमाणात शेअर होत असून अनेकजण यावर विविध प्रतिक्रिया देताना दिसत आहेत.
