---Advertisement---
मध्य पूर्वेत अमेरिका, इस्रायल आणि इराण यांच्यात सुरू असलेल्या लष्करी संघर्षाने आता तिसऱ्या आठवड्यात प्रवेश केला असून या युद्धामुळे संपूर्ण प्रदेशात तणाव वाढत चालला आहे. दरम्यान, शनिवारी इराकची राजधानी बगदाद येथील अमेरिकन दूतावासावर मोठा क्षेपणास्त्र हल्ला झाल्याची माहिती समोर आली आहे. दूतावासाच्या हेलिपॅड परिसरात क्षेपणास्त्र कोसळल्याने परिसरात मोठा स्फोट झाला आणि कंपाऊंडमधून काळ्या धुराचे लोट उठताना दिसले.
असोसिएटेड प्रेसच्या वृत्तानुसार, बगदादमधील अमेरिकन दूतावास परिसर धुराने भरल्याचे फोटो समोर आले आहेत. त्याचवेळी संयुक्त अरब अमिराती (यूएई) मधील फुजैराह बंदराजवळील एका तेल सुविधेलाही आग लागल्याची घटना घडली. इराणी ड्रोनचा अवशेष पडल्यामुळे ही आग लागल्याचे अधिकाऱ्यांनी सांगितले आहे. या घटनांमुळे संपूर्ण मध्य पूर्वेत लष्करी हालचालींना वेग आला आहे.
दरम्यान, अमेरिकेचे अध्यक्ष डोनाल्ड ट्रम्प यांनी शुक्रवारी इराणला इशारा दिला. अमेरिकन सैन्याने इराणच्या तेल निर्यातीचे महत्त्वाचे केंद्र मानल्या जाणाऱ्या खार्ग बेटावरील लष्करी तळ उद्ध्वस्त केल्याचा दावा त्यांनी केला. तसेच, होर्मुझच्या सामुद्रधुनीतून जाणाऱ्या जहाजांवर हल्ले सुरू राहिल्यास इराणच्या तेल पायाभूत सुविधांवर पुढील कारवाई केली जाईल, असा इशाराही त्यांनी दिला.
यावर प्रतिक्रिया देताना इराणच्या संसदेच्या सभापतींनी अमेरिकेच्या धमक्यांना कडाडून विरोध केला असून अशा कोणत्याही हल्ल्यांना अधिक ताकदीने प्रत्युत्तर दिले जाईल, असे स्पष्ट केले आहे.
दरम्यान, अमेरिका मध्य पूर्वेत आपली लष्करी उपस्थिती वाढवण्याच्या तयारीत आहे. अमेरिकन अधिकाऱ्यांच्या माहितीनुसार, सुमारे २,५०० अतिरिक्त मरीन सैनिक आणि एम्फिबियस असॉल्ट जहाजे या प्रदेशात पाठवली जाणार आहेत.
दुसरीकडे, इराणकडून इस्रायल आणि काही आखाती अरब देशांवर क्षेपणास्त्र व ड्रोन हल्ले सुरूच असल्याचे सांगितले जात आहे. तसेच धोरणात्मकदृष्ट्या महत्त्वाची असलेली होर्मुझची सामुद्रधुनीही प्रभावीपणे बंद केल्याचा दावा केला जात आहे. या सामुद्रधुनीतून जगातील मोठ्या प्रमाणात तेल वाहतूक होत असल्याने या संघर्षाचे परिणाम जागतिक स्तरावर जाणवण्याची शक्यता व्यक्त केली जात आहे.
