---Advertisement---
देशभरात एलपीजी टंचाईच्या बातम्या समोर येत असतानाच पेट्रोलियम आणि नैसर्गिक वायू मंत्रालयाने परिस्थिती पूर्णपणे नियंत्रणात असल्याचे स्पष्ट केले आहे. नागरिकांनी अफवांवर विश्वास ठेवू नये, असे आवाहनही मंत्रालयाने केले आहे.
मंत्रालयाच्या माहितीनुसार, देशात पेट्रोल, डिझेल आणि एलपीजीचा पुरेसा साठा उपलब्ध असून कुठेही कमतरता नाही. एलपीजी उत्पादनात तब्बल ४० टक्क्यांनी वाढ करण्यात आली असून सध्या दैनंदिन उत्पादन ५० टीएमटीपर्यंत पोहोचले आहे. हे देशाच्या एकूण गरजेच्या (सुमारे ८० टीएमटी) ६० टक्क्यांहून अधिक आहे.
यामुळे एलपीजी आयातीची गरज कमी झाली असून आता केवळ ३० टीएमटी इतकीच दैनंदिन आयात आवश्यक आहे. याशिवाय, अमेरिका, रशिया, ऑस्ट्रेलिया आदी देशांतून ८०० टीएमटी एलपीजीचा अतिरिक्त पुरवठा भारताकडे येत आहे. हा साठा देशातील २२ आयात केंद्रांवर उतरवला जाणार आहे.
दररोज ५० लाखांहून अधिक एलपीजी सिलिंडर्सचा पुरवठा सुरळीतपणे केला जात आहे. काही दिवसांपूर्वी अफवांमुळे मागणी ८९ लाखांपर्यंत वाढली होती; मात्र आता ती पुन्हा सामान्य पातळीवर आली आहे.
साठेबाजी आणि काळाबाजार रोखण्यासाठी सरकारने व्यावसायिक सिलिंडर्सचे वाटप ५० टक्क्यांपर्यंत वाढवले आहे. तसेच अफवा पसरविणाऱ्यांवर कडक कारवाईचा इशाराही देण्यात आला आहे.
एकूणच, एलपीजी पुरवठा सुरक्षित असून नागरिकांनी घाबरून अतिरिक्त साठा करू नये, असे स्पष्ट करण्यात आले आहे.
