---Advertisement---
देशभरातील अनेक राज्यांमध्ये सध्या सूर्य आग ओकत असून उन्हाच्या तीव्र झळांमुळे नागरिक अक्षरशः होरपळून निघाले आहेत. अनेक राज्यांमध्ये पारा ४७ ते ४८ अंश सेल्सिअसवर पोहोचल्याने जनजीवन पूर्णपणे विस्कळीत झाले आहे. भारतीय हवामान खात्याने (IMD) येत्या २८ मे पर्यंत देशातील वायव्य, मध्य आणि पूर्व भागात तीव्र उष्णतेच्या लाटेचा (Heatwave) इशारा दिला असून पुढील ६ दिवसांसाठी ‘ऑरेंज अलर्ट’ जारी केला आहे.
दुसरीकडे, दिल्ली-एनसीआरमध्ये नागरिकांना दुहेरी संकटाचा सामना करावा लागणार आहे. येथे उष्णतेसोबतच ताशी ६० ते ८० किमी वेगाने धुळीचे वादळ, विजांचा कडकडाट आणि पावसाची शक्यता वर्तवण्यात आली आहे.
शुक्रवारी देशातील अनेक शहरांमध्ये तापमानाने उच्चांक गाठला. उत्तर प्रदेशातील बांदा येथे देशातील सर्वाधिक म्हणजे ४८.२° सेल्सिअस तापमानाची नोंद झाली. तीव्र उन्हामुळे येथील वाहतूक सिग्नल काही काळासाठी बंद ठेवण्याची वेळ प्रशासनावर आली आहे. महाराष्ट्रातील विदर्भालाही उन्हाचा मोठा फटका बसला असून ब्रह्मपुरी येथे ४७.२°से आणि वर्ध्यात ४७.१°से तापमानाची नोंद झाली आहे.
देशातील प्रमुख शहरांमधील तापमान (शुक्रवार):
शहर/प्रदेश राज्य तापमान (°सेल्सिअस)
बांदा उत्तर प्रदेश ४८.२°से
खजुराहो मध्य प्रदेश ४८.०°से
ब्रह्मपुरी (विदर्भ) महाराष्ट्र ४७.२°से
वर्धा महाराष्ट्र ४७.१°से
नजफगड दिल्ली ४७.०°से
रोहतक हरियाणा ४६.९°से
बठिंडा पंजाब ४६.६°से
नागपूर महाराष्ट्र ४६.५°से
श्रीगंगानगर राजस्थान ४६.२°से
प्रयागराज उत्तर प्रदेश ४६.०°से
२८ मे पर्यंत ‘या’ राज्यांना तीव्र झळा; युपीत ‘रेड अलर्ट’
राजस्थान आणि मध्य प्रदेश: पश्चिम राजस्थानमध्ये २४ ते २८ मे दरम्यान ‘तीव्र’ उष्णतेची लाट असेल. मध्य प्रदेश आणि पूर्व उत्तर प्रदेशातही हीच स्थिती राहील. उत्तर प्रदेशातील १० जिल्ह्यांमध्ये ‘रेड अलर्ट’ जारी करण्यात आला आहे.
पंजाब, हरियाणा आणि दिल्ली: या राज्यांमध्ये उष्णतेची लाट सातत्याने कायम आहे. गुरुग्राममध्ये पारा ४२ अंशाच्या पार गेल्याने २४ ते २७ मे दरम्यान ऑरेंज अलर्ट दिला आहे.
विदर्भासह छत्तीसगड, झारखंड, ओडिशा, तेलंगणा आणि आंध्र प्रदेशच्या किनारपट्टी भागात वेगवेगळ्या दिवशी उष्णतेच्या लाटेचा अंदाज आहे. पूर्व भारतात २६ मे पर्यंत उष्णतेचा इशारा कायम राहील.
दिल्लीत वादळाचा इशारा; हवामान खात्याचे आवाहन
आयएमडीच्या ‘नाऊकास्ट’ अंदाजानुसार, दिल्ली-एनसीआरमध्ये ६० ते ८० किमी प्रतितास वेगाने जोरदार वारे आणि धुळीचे वादळ येण्याची शक्यता आहे. यामुळे दृश्यमानता (Visibility) कमी होऊन वाहतुकीवर परिणाम होऊ शकतो.
नागरिकांनी उष्माघातापासून वाचण्यासाठी काळजी घ्यावी. दुपारच्या वेळी मोकळ्या जागेत जाणे टाळावे. वादळाच्या काळात झाडे, कमकुवत बांधकामे आणि होर्डिंग्जपासून दूर राहावे. सुरक्षित ठिकाणी आश्रय घ्यावा आणि हवामानाच्या ताज्या अपडेट्सवर लक्ष ठेवावे.
